【食譜】煙煙韌韌 紫薯西米糕

我平日都比較少整中式甜點，其實唔係我唔想整，只係老細唔多鐘意食，小小豬又只愛食啫喱、果凍依啲凍甜品，整左冇人食又真係幾冇癮兼又冇動力嘛！

事緣今日要同老公齊齊返教會開派對，所以我終於等到機會整我想試好耐嘅西米糕啦。

其實以中式甜點嚟講除左砵仔糕之外，我就鐘意食西米糕，因為好鐘意佢煙煙韌韌嘅口感。砵仔糕我就仲未搵到細細缽仔嚟，所以就先整西米糕啦！

西米糕簡單得嚟又多變化，餡料就可以隨自己喜好加入，真係可以話人人地啱食。原本我都打算自己整埋個餡料，不過由於時間關係，最終我都全係最現成的，所以就貪新鮮用紫薯蓉嚟做餡料。

材料都係好簡單，包括有：

西米 100g、砂糖 30g、馬蹄粉 70g、水 70ml、食油 1湯匙(我用橄欖油)、紫薯蓉 隨意。

做法：

先將西米放入滾水中煮8分鐘，再熄火下蓋焗20分鐘，直至西米變成透明。

然後用凍水沖洗過冷河備用。

準備好足夠份量嘅馬蹄粉及砂糖。

然後加入水拌勻，直至看見兩者完全混合。

再加入食油。

最後加入西米再拌勻至全部材料混合好晒。

先放西米到半滿於模內，再加入紫薯蓉

(份量多少就隨口味啦，不過就唔建議太多，如果唔係入口就會好滯啦)，最後再放入西米。

隔水大火蒸10分鐘，時間到了可以先用竹籤輕插睇下仲冇黏住啲粉，如果冇就即係全熟，可以食得啦。 

哈哈哈...…第一次整個賣相都叫做見得下人呀～

味道都叫算合格啦，都總算做到煙煙韌韌嘅口感，而且配合埋個紫薯蓉，兩者都真係幾夾！

不過要提一提大家，最係就趁佢仲係熱熱地嘅時候食，因為凍左就會有少少變硬，到時就會有少少影響個口感！

經過今次成功之後，有左少少信心就可以下定決心，下一次一定要向難度挑戰，快啲搵細細嘅缽仔，整砵仔糕先得＇

(其實我曾經整過三次砵仔糕，每次都係失敗呀...…鳴鳴鳴！)