裝修佬話你知：浴缸清潔保養方法 (呀J)

辛苦勞累咗一日，浸返個靚浴即刻舒緩疲勞，精神爽利。然而好多人淨係享受浸浴帶來嘅樂趣，而無清潔保養嘅意識，如果長時間無清洗保養，就會滋生細菌，容易誘發皮膚感染，所以定期嘅清洗非常重要。

以下裝修佬教大家浴缸嘅清洗保養方法。

亞加力浴缸 

亞加力浴缸係現時使用最普遍嘅浴缸，亞加力係一種特殊嘅塑膠材料，可以隨意做成各種形狀，但缺點都好明顯，就係唔耐用，易刮花易老化變色，所以係日常清潔保養中尤其需要注意。 

亞架力浴缸每個禮拜用海綿或棉布，唔可以用粗布、百潔布，唔可以用任何含有粒狀物體嘅清潔劑，避免太陽光嘅直射接觸。可用溫和清洗劑如洗潔精，切忌用研磨清洗劑，或可用玻璃水清潔。

木質浴缸 

木質浴缸嘅出現可以追溯至古代，當時達官貴人都鐘意浸木質浴缸養顏放鬆。木質浴缸係日常清潔要注意要將污水完全排乾，以免木質吸收污水而加速老化或產生霉斑。 

係木桶出廠時，會油一層桐油，所以係購買嘅頭幾天一定要保持廁所空氣流通同開窗通風透氣，以免佈滿油漆味。最初試水會出現滲水，係屬於正常情況，將水放滿後要浸12個鐘頭以上，令木桶充分浸潤，木桶滲水情況就會停止。 

因為木材本身會熱脹冷縮，所以唔可以直接曬太陽或受冷風吹，假如長時間唔用兩個月以上，可將木桶淋濕後用大膠袋封住，避免空氣帶走水分。平時唔用時最好放少許清水，令其吸收水分，保持木質濕潤，但留意水唔可以過多，因為浴室本身就有一定濕度。 

鑄鐵浴缸 

鑄鐵浴缸係先用鑄鐵整出浴缸造型，然後係鑄鐵表面噴經高溫處理嘅材料製作而成。鑄鐵材質表面鍍上的超薄瓷釉可以將鑄鐵全方位保護起身，起到防氧化防銹防腐蝕等作用。又因為鑄鐵同釉面都係非常耐用的材料，所以鑄鐵浴缸用50年都無問題。 

鑄鐵浴缸表面經過高溫施釉處理，所以具有光滑平整，耐酸鹼及化學品，便於清潔等優點。而且一般鑄鐵浴缸都唔帶按摩系統，簡單結構避免藏污納垢。 鑄鐵浴缸每次用完都要用清水充分沖洗，再用乾布抹乾。如遇到頑固污漬，要用清洗劑清洗。用軟尼龍刷清潔底部防滑面。勿用鋼絲球、鋼絲刷或研磨海綿刷洗。 

裝修佬溫馨提示

無論係邊種材質嘅浴缸，如果要想保持浴缸光澤度以及延長使用壽命，就需要對浴缸清潔保養，保養以每個禮拜一次最為合適。雖然唔同材質有唔同嘅清潔保養方法，但相同嘅係唔可以用強酸強鹼物質同硬物清潔浴缸表面。選擇正確嘅清潔劑，就會事半功倍。

(以上圖片均來自網路，如有任何版權問題，請與本站聯絡)