今朝最大新聞？應該算係九月兩個風：颱風海鷗、同iPhone 6第二次預訂。

係颱風方面，海鷗應該係今年第一個正式颱風假，雖然行文之時個風重打緊，但天文台已經係咁話十二點前隨時改掛三號波，大家可能都係賺得個兩、三個鐘，但對於個班伙記做少兩個鐘，都好似個市會、公司會即刻執笠、香港會金融風暴嘅老闆來講，應該都係佢地容忍極限架喇。

但多得呢個風，就俾咗好多人一個機會，去抽今朝個iPhone 6第二預訂。不過今年Apple又有新玩法，為咗杜絕炒家用程式排隊抽機，今年就加入咗號碼認証、以及SMS認証兩種方法。不過擋得著炒家用程式，卻無預到一個打風多咗咁多人抽機，結果五分鐘內已經連合約機都全部出清。

而今次新安排，好多人都話根本send完sms過去Apple認証之後，唔係Delay幾分鐘先得、就係短訊一去無回頭。不過除咗X兩句老母、或者send個sms去Apple短訊系統度X鬼之外，只好希望下次預訂會好彩小小。