啱啱先放低飯碗，轉個頭就已經覺得非常肚餓？係唔係真係因為自己個肚生蟲，先至咁快會有肚餓嘅感覺，令自己可以食唔停口呢？對於出現咁嘅狀況，來自紐約嘅營養師麗莎‧楊澤則表示正常嚟講大家應該係要喺進食後3至4小時先至會覺得肚餓，而之所以會將呢種感覺突然提前左，或者就會係因為受到下列9大點的影響所致：

1. 食得太多精製碳水化合物食物

精製碳水化合物食物如白麵包、白米、曲奇及糖果，其實都係非常容易被人徹底消化，從而令人嘅血糖突然飆升。而當大家嘅血糖喺短時間內下降之後，大家就自然會感覺到飢餓嘅感覺，令人好像再次填飽肚子，為身體補充能量。

2. 缺乏蛋白質、脂肪或纖維

蛋白質、脂肪同纖維都係令人感到飽肚嘅三樣養分，全因佢地同樣都係需要較長嘅時間先可以完全獲得消化。而喺三樣嘅養分當中，蛋白質以及脂肪就係最能夠以最短時間令你飽肚，纖維則能有效穩定血糖，同時增加飽肚感。

3. 份量唔夠

假如你其實都避開左食精製碳水化合物食物，以及並唔係缺乏蛋白質、脂肪或者纖維，咁可能就係你嗰一餐食嘅份量太少，令你根本無獲取足夠營養。要避免出現咁嘅狀況，你或者可以食多D有營養嘅食物，繼續避免進食精製碳水化合物食品。

4. 口渴

肚餓嘅感覺除左有可能係唔夠飽而引發之外，其實更有機會係有人將口渴嘅感覺同飢餓混為一談，誤以為自己係肚餓。要解決呢種感覺除了可以立即飲水之外，每一日都進食適量嘅高水分水果或蔬菜其實都相當有效。

5. 新陳代謝快

大家身邊應該總有一個永遠食唔肥嘅朋友，而原來對於某類人嚟講，食極唔肥其實係基因上面嘅一大優勢，而且更會令人更加容易吸收營養，需要比平常人食多幾餐。

6. 唔夠瞓

由於唔夠瞓就會造成荷爾蒙失調，令人皮質醇偏高，因此喺咁嘅情況之下，人就會更加容易有衝動食更多食物，特別係含有脂肪及糖分嘅食品，希望能夠為身體補充能量。除此以外唔夠瞓亦會令生長素紊亂，繼而令人額外飢餓。

7. 運動量高

假如你係非常喜歡做劇烈運動，咁你所燃燒嘅卡路里就一定會比平常人高，所以就更需要補充番失去嘅能量。但記得喺懾取流失養分嘅同時，千萬唔好因為飢餓嘅感覺而食過龍，如果唔係你做多多嘅運動都無法保持理想身形，反而仲令自己肥左幾磅。

8. 受藥物影響

部分醫生處方藥物，其實都有機會增加你嘅食慾，令你更容易感覺飢餓。如果係食藥之後經常都有肚餓嘅感覺，咁就建議你向醫生查詢，了解一下藥物所帶來嘅副作用係唔係當中嘅成因。

9. 就嚟M到

當女性就嚟M到，身體的溫度都會因為週期變化而隨之升高，從而就會令人更容易感到飢餓，比平常更想食野。一般來講由月經而引發嘅飢餓感，大多數都只會喺月事前夕一兩天發生。