不一樣的澳門：有得滑草兼水上單車

其實我大半年前過來澳門玩嘅時候，我都已經計劃咗帶小小豬去滑草，始終佢都係未玩過，都好想去接觸唔同嘅活動，等佢可以見識多啲嘛。不過因為落雨，所以就冇得去玩， 當時小小豬都有啲失望㗎。希望總係在明天嘅，今次終於玩到啦！

其實澳門係有兩個滑草場，另一個就位於大環山公園，嗰個場地規模會大啲(當然去玩嘅人又會多 啲)，同埋係用仿草地嚟滑。對上一次呢澳門大仁已經玩過嗰一個滑草場， 所以我地今次就揀依一個以真草為地嘅滑草場啦。黑沙水庫郊野公園除左有得免費滑草之外， 仲有得超優惠價玩水上單車，仲唔係一次過滿足兩個願望……哈哈！

係氹仔市中心都可以搭15號巴士去到目的地，不過我地為咗爭取玩樂時間，我地就Book左部七人車，由酒店直接出發啦！

經過半個鐘唔使嘅車程，我地就到達咗黑沙公園。其實我地有一刻係諗會唔會師傅車錯地點，因為周圍只係得個黑沙沙灘同埋一啲露營地點，真係唔覺有得滑草。

正所謂出外靠朋友，係我地邊行邊問之下，原來只要沿住小徑向山行，就可以去到黑沙水庫郊野公園。

沿途路經依個樹蔭，係澳門黑沙其中一個著名景點，初哥哥都喺度Chok過呀……哈哈～

條路都唔難行，我地沿路經過一個燒烤場，之前再上去小山路，就可以去到。 

雖然我哋一行六人都係缺乏運動嘅朋友(當然兩小朋友例外)，不過都只係用左大約二十分鐘就可以去到目的地了。

一見到個地圖，兩個小朋友就已經急不及待要睇下點樣行去玩呀~

行上一個入小山坡，就見到我地第一個玩樂點，就係真草滑場啦~

雖然地方唔算大，滑草兜亦都只有五個供應，不過好正在人流唔算多，而且每個小朋友都好守規矩，玩完一次就會排隊再輪過，所以大家都玩得好興奮呀！

小小豬又玩成點呢？有得玩佢又點會唔放過，來來回回都玩咗五六次，只係辛苦Daddy 幫佢做苦力，拎住個滑草兜行幾轉。

不過一向廿四孝見稱嘅Daddy，見個仔投入地玩，佢又點會介意呢？

滑草場雖然係好玩，不過原來只限小朋友，同埋唔可以兩個小朋友一齊滑落嚟。冇得到同小小豬一齊滑係有啲可惜，不過唔緊要，最重要係小小豬玩得開心嘛！

之後我地就轉戰水上單車，問在場當值職員，佢話沿斜路行上去就見到。咁我地就緊係聽話乖乖沿住行，不過越行越唔對路，我地好似行緊上山，完全唔似去水庫。

其實我地真係行錯路，我地行咗去教育徑方向，阿Q啲諗： 行山幾好呀，身心健康嘛！

另外，個周圍風景又幾靚，行下都幾舒服呀(只係熱左少少)。原來水庫水上單車之處，就正係滑草場後面，沿住行去滑草嘅起點位，再行多一個小路口就見到啦。

我地行去水上單車嘅地方，需要經過一個吊橋，依條吊橋都係好出名，亦都係黑沙景點之一嚟呀~

不過依一刻我地都心情吊橋上玩，因為玩水上單車嘅靚地方，個心已經想即刻跳落去玩啦。

水上單車我地之前係綠田園都有玩過，嗰次就係$80玩半個鐘，實在又好似貴咗啲。

不過依度簡直係超抵價，雙人單車20蚊玩20分鐘，真係抵到冇朋友，梗係即刻畀錢去玩啦！

大小朋友都著上安全救生衣就可以去玩啦。 

今次我地兩家就發揮好媽媽精神，因為我地兩個都係媽媽落場陪玩，爸爸們就係岸邊影相啦。

其實我一啲都唔介意，因為個環境真係唔錯，係水庫入面飄浮一下，都係一件賞心樂事。

當然只係我個人意願，小小豬又點會放過我，佢話周圍環境好靚，要隻船仔周圍去，亦都即係要我踏唔停啦。

話就話係雙人，不過小小豬腳仔都未夠長，所以基本上全程咪又係我一個人踏，真係攰到冇朋友呀。

雖然係攰到一個頂點，不過係水上單車上可以同小小豬傾下周圍嘅風景，又俾佢高談偉論一返，都係一個唔錯嘅親子時光。

話咁快就過左20分鐘，我地就夠鐘要上水了。認真的，其實整個環境都係好舒服，所以我都有點想玩多20分鐘。但我雙腳已經不受我控制，所以都係留待下次有機會嚟再玩啦。

離開時見到有一個植物迷宮，原來都想入去玩一轉，只可惜因為我地已經BOOK左枱回酒店食晚飯，所以都係要留下次機會了。

之前都提及過黑沙水庫郊野公園交通係冇咁方便，我地走嘅時候終於感受到。 因為嗰度的士唔多，加上又冇網絡接收到，我地唔可以上網Book車，最後就等15號巴士返出氹仔市中心。

我地大大話話都等咗45分鐘先等到巴士，係見到巴士嚟嘅時候真係有從未如此興奮過嘅心情呀。

其實每一次嚟澳門都係酒店、手信街、娛樂場同食嘢，其實都有好多地方值得我去玩，就好似今日依個黑沙郊野公園為例，你又點會諗過一個地方可以免費/咁抵去玩樂，仲好啱一家大細去玩添。(當然唔好好似我地咁，記得早少少預備好回程車嘅安排呀)

黑沙水庫郊野公園基本上就係全日開放，不過入內玩嘅兩項設施就有按時間開放，所以計劃嚟玩嘅朋友仔就要留意：

- 真草滑草場開放時間為星期六、日，8:30-12:30及13:30-17:00，只供3歲或以上，且身高為145cm以下兒童使用。

- 水上單車開放時間為每年四月一日至十一月三十日，逢星期一至日(包括公眾假期)11:00-17:00(當日睇佢4:30已經唔再俾遊人進入了)。

供租用 的腳踏艇每次二十分鐘計算，雙人腳踏艇費用為澳門幣二十元及四人腳踏艇費用為澳門幣四十元。為安全起見，須遵守現場工作人員指示穿著救生衣，孕婦及未滿6 歲者禁止進人浮台區域，年齡6至12歲者須由家長或成人陪同下方可租用腳踏艇。