Facebook係全球目前最多人使用嘅社交媒體之一，大家通常習慣左得閒就拎部手機出嚟碌下，留意下新聞以及朋友嘅最新動態。但用左Facebook咁耐，儲埋儲埋咁多「朋友」，大家應該難免會遇到一啲狀態同行為都令人相當煩厭嘅「好友」。
但總括嚟講究竟邊類嘅人先係最黑人憎呢？唔使諗喇！當中必定會包含以下8種！
1. 政治家
當近期香港，甚至世界某一個角落發生任何政治事件，呢類人都一定會挺身而出瘋狂分享相關新聞，同時喺自己嘅post入面加入一啲立場非常鮮明嘅意見，營造出「眾人皆醉我獨醒」嘅感覺。
2. 無時無刻都自拍
相信每一個人身邊都總會有一個超級沉迷自拍嘅女性朋友，無時無刻都要影下自己個樣又或者遇到嘅大小二事，就算切親手指都要影左相先，之後先去療傷。其實每個人都有自己私人空間，係唔係真係需要每秒鐘都同人直播自己嘅最新動向呢？或者真係大家價值觀並非相同吧？
3. 去到邊都要Check-in
除左自拍之外，Check-in嘅行為其實都同樣令人非常費解，尤其係某種只會check-in地址而唔會補充任何狀態嘅人就更加古怪。其實佢地有冇諗過無時無刻都報告自己嘅位置好容易會令人有機可乘，甚至係危及自己生命嘅呢？去旅行嘅時候大家都係諗清楚先好走去Facebook check-in呀...
4. 健身房自拍
得喇知道你又去左健身喇！但你做運動又會得閒玩手機嘅？咁究竟你去健身定去選美呀？其實真係無人想知道你係唔係健緊身，又或者大家都已經讚夠左你日日都post嘅完美身段！
5. 網店東主
「最近天氣轉乾皮膚痕，轉用左呢隻bodylotion之後就唔痕喇！」就咁睇好似係真誠分享，但其實一日裡面你都唔知見到佢個身由痕變唔痕，又由唔痕變番痕幾多次，因為佢地為左sell自己網店嘅產品，真係可以去到好盡咁洗你個News Feed。
6. BB相轟炸機
好多有左小朋友嘅家長都好興將小朋友全相公諸於世，而且更加係同瘋狂自拍者有得揮咁，不斷上載小朋友嘅相黎轟炸大家。嫌爸爸媽媽喺自己個wall post相唔夠煩？幫仔女開埋Facebook又點話！總之就係唔理小朋友願唔願意，就首先同全世界公佈晒佢小時候嘅私生活同個人資料啦！
7. 大文豪
喺網絡世界上面無論你係乜野出身，只要你識得打中文字，唔理你係唔係寫緊病句定識唔識用標點符號，總之你識打一堆野出嚟就已經可以話自己係作家。貼幅悲情相再加一大堆煽情嘅文字發下牢騷，咁就得架喇！但其實又有邊個咁得閒去睇你個篇千字文丫？！
8. 有乜唔明剩係搵FB神
其實呢個世界上面係有Google架囉！有咩唔明麻煩首先用Google查找一下先啦！唔需要下下奉旨人地會解答你嘅疑問架囉！
