去斐濟，尋找幸福笑容!

唔好以為斐濟人，大大隻，黑黑實實，睇落惡形惡相，有組織向全球58個國家地區，做了一個幸福調查報導，但結果顯示斐濟以85分高據首位，成為最幸福嘅國家，而香港只有35分，唔知排幾位。要尋找香港人失落多時的幸福笑容。斐濟人可以話係幸福笑容派嘅大師父，今次人人去旅行就帶你去斐濟學番一招半式，點樣可以笑一笑，世界更美妙。

第一式 Fiji Time 斐濟時光

上網查字典「Fiji Time」，得出的解釋係：「沒有時間觀念，不用守時，永無準時。」對習慣睇鐘做人、分分秒秒都係錢的香港人來說，簡直impossible，但係在斐濟，你大可「忘了時間的鐘」，完全relax！

由你一隻腳踏上往斐濟的航機開始，時間只係一堆數字和代號，完全變得唔重要，唯一要做係enjoy and relax！初上機你可能會唔慣，覺得好hea或好悠閒，唔使奇怪，feel到就啱喇，「Fiji Time」就係要你放鬆、零壓力和盡情咁享受！斐航嘅空中服務員從容不迫、親切和譪的服務態度，會令你覺得膊頭上幾斤重的「石頭」無晒，心裡面嘅「悶氣」無晒，一身輕晒！香港人平時生活樣樣嘢要快，一項緊接一項，冇唞氣位，逼得太緊，為乜呢？你睇斐濟人本著「Fiji Time」精神，日子過得「梳乎」，冇憂無慮，咁至係真正嘅生活態度嘛！

第二式 笑一笑 世界更美妙

除咗丟低時間落垃圾桶外，整個旅程裡你只要記住一件事，就係「Smile」。香港人和笑容向來唔係friend，有時睇笑片都唔識笑。「笑一笑世界更美妙~~」，林子祥唱足幾十年都無辦法感染香港人；我望一望空中服務員的笑容，就恍然大悟笑的影響力有幾大。或者你會話：「從事服務行業，對客無時無刻要笑，梗o架啦，有乜稀奇啫？」無錯，笑容係服務的基本，不過佢地真人示範的，絕對唔係公司指定的1號、2號或3號笑容，而係Big Smile，發自內心嘅，留心睇，佢哋連對眼都笑緊o架！無論你上機前有幾煩躁不安苦惱，睇見佢哋個個笑到「蓮子蓉」，包公都變壽星公，自自然然識笑住對返人。

第三式 BulaBula 載歌載舞

「Fiji Time」的影響下，斐濟人生活得開心，相由心生，個個都是樂天派。開心快樂可以傳染，咪以為講得誇張，絕對親身經驗。我們一落機即有3人大樂隊迎接，唱住歌彈住結他，唏唏呵呵，勁有氣氛。雖然聽唔明佢哋唱乜，但單憑旋律feel到佢哋冇當你「生保人」，當正你係老友，熱情到不得了。

在斐濟，無論任何時候、去到任何角落，只會見到當到人笑到見牙唔見眼，永冇燶面。就算你同我都覺得辛苦到死的工作，斐濟人一樣笑住做，超享受。以入住resort時的傳統歡迎儀式為例，車未到埗，隔條街已經聽到斐濟工作人員奏樂唱歌，未見其人先聞其聲，當時心諗：「使唔使咁大陣仗？」一生人未做過VIP，今次終於體驗到。明明天氣熱到爆炸，企響度唔郁都標晒汗，佢哋傾盡全力在歌在舞，流到成身汗依然笑笑口；你主動影相，佢哋再跳得落力啲，笑得更燦爛。我絕對相信，佢哋唔係抱住「做好呢份工」的態度，而係真心enjoy，熱情迎賓簡直係與生俱來，唔係點可以日日「Bula! Bula!」？說到底幸福開心係唔使人教，B B仔就最好嘅例子，咩都笑一餐，只要人人保持住一棵天真嘅心，每個地方都會變成世界最幸福。

嗚謝:

斐濟旅遊局

http://www.fiji.travel/

Fiji Airways 斐濟航空

擁有60多年歷史的斐濟航空，是斐濟國營航空，也是南太平洋最主要的航空公司，主要提供往來於太平洋地區、北美洲和香港的航班。2014年起增班至三班直航航班，每周三班航機從香港直飛斐濟南迪，採用最新的A330空中巴士。

www.fijiairways.com