【地質公園初體驗】探索萬宜地質步道

我地參加左L'hotel地質公園遊住宿計劃，除左入住一間好舒服嘅套房之外，最主要同埋最吸引我嘅活動，就一定係可以到東壩地質公園參觀，探索萬宜地質步道嘅海蝕洞，依一個行程絕對係令我同小小豬大開眼界呀~

其實我地嘅行程都幾豐富，既去火山探知館睇左啲歷史同對了解六角岩柱形成過程，之後我地就深人禁區，去萬宜水庫東壩嘅地質公園親身距離欣賞世界級六角形岩柱，仲可以踏上新興建木橋望望海蝕洞，依啲機會又真係好難得呀！

我地行程第一個目的地就係位於西貢市中心嘅火山探知館，其實係門口我都經過幾次，不過就唔識入去睇，原來一個細細嘅地方就可以了解到香港六角岩柱形成過程同埋與火山有關嘅資料呀。

今次我地嘅行程有地質公園導賞員專員為我地介紹，有專業人員為我地講解，真係聽得更加投入呀！

展覽區內有好多同六角岩柱同埋火山嘅資料，其實我依啲少留意大自然嘅人，真係估唔到原來大自然嘅力量係咁大呀。

除一啲資訊性資料外，展館內仲有唔同種類嘅岩石俾大小朋友摸下，親身感受下岩石嘅質感係點呀~

除左岩石之外，場內另一主題就係火山，所以都有模擬岩漿同埋火山爆發嘅原理俾小朋友感受呀。

依家都係數碼時代，所以係各展品上都會設有QR Code，一掃描就可以了解更多詳盡資料，啱晒各大小朋友啦。

另外當然唔少得電腦系統，等小朋友自己揀有興趣嘅資料睇呀！

如果入開西貢市中心，有興趣都可以入嚟行一轉，應該對岩石及火山有多少少認識呀。

之後我地就搭大約40分鐘嘅SynCab專車，就嚟到地質公園啦。

大鄉理嘅我真係一落車就嘩嘩大叫，因為個VIEW真係勁靚，好難想像香港係可以有咁靚嘅地方！

(當然另一原因係今日天氣勁正，藍天白雲...…雖然係熱左啲啲，不過真係好靚呀！)

係未開始探索萬宜地質步道時，當然又係聽書時間，MeiLing先為我地講解岩石嘅資料。

原來香港嘅岩柱係富含硅質的淺色流紋質火山岩，柱狀呈六邊形，所以就有六角岩柱之稱。

由於地質公園係唔可以隨便換啲岩柱，但為左令大家可以感受六角岩柱係點，所以都有一少部分天然碎石擺放係路邊，俾大家摸下。

(嘩...…碎石都咁大舊，真係好有威力呀)。

MeiLing仲為我地介紹左一款山草(我唔係好記得個名...…嘻嘻)，只要用手輕輕捽一捽，就會有啲類似白花油嘅味道，聞一聞真係醒神晒，小小豬都係靠依陣味有返精神呀。

好啦...…我地開始出發探索萬宜地質步道啦。

個VIEW真係勁正，超級舒服呀！

環境真係靚到唔識講，前面一望無際，唔係經MeiLing講都唔知，原來一直向前的話就可以達到菲律賓。若果有海嘯的話，五分鐘已可到達香港。

由於我地同行有MeiLing依位專業導賞員在場，所以每個特式地方佢地會為我地講解。步道其實都係好平坦，非常易行(只係熱左少少)，沿途設有解說牌及基本郊遊設施，所以就算自己嚟都可以對各岩石有加深認識呀。

天然嘅六角岩柱，真係好宏偉，望上去好似一個巨型管風琴，好特別呀。

行山啫...…洗唔洗咁開心，不過開心就係證明佢係享受啦！

除左一條條嘅六角岩柱之外，約係1億4000多萬年前，岩柱仍處於半塑性狀態，因受到地震和區域性下沉影響而扭曲成S形。依啲S形六角形岩柱真係可以話不經加工純天然，所以都係嗰句...…大自然嘅神奇力真係唔可以睇少呀。

仲有一道侵入岩牆都係好值得我地細心觀察，因為係地質作用下，岩柱沿此裂開，地下嘅岩漿沿裂縫入侵，冷卻後形成深灰色的侵入岩牆，估計最年輕那岩柱都有4000萬歲呀。

除左留心觀察唔同岩牆/柱之外，四周嘅景色都係好值得留意。因為好天氣加上有山又有水，仲有啲大大小小嘅石頭，真係靚到唔識形容。

小小豬話見到個咁靚嘅湖水，好想跳落去游水喔(我地要愛護大自然，緊係唔可以咁做啦)。

地質公園係今年五月底正式開放左依條木橋步道，可以等遊人既安全又可以近距離欣賞海蝕洞。

其實咩係海蝕洞？我之前都真係唔太了解，好在有MeiLing詳細嘅介紹，我地先對海蝕洞有多少少知識。

原來海蝕洞係由大浪浸蝕而成，由於1978年水庫建成後有防波堤阻擋，所以洞穴就冇再受侵蝕，依個海蝕洞嘅形態就由嗰時開始，都KEEP左三十幾年啦。

哈哈哈…...幾位小朋友就最鐘意依個位置，因為向住海蝕洞說話，就會聽到回音呀。

睇左一陣海蝕洞，我地就準備回程。行經防波堤，啲防波堤又幾得意～

我同小小豬完全冇行山經驗，不過今日依個旅程又真係好舒服，一啲都唔辛苦(只係熱左少少啦)。

而且仲可以對大自然嘅岩柱/海蝕洞有多啲認識，所以都真係真心可以向大家推介呀！

經過今日呢個旅程，我發覺香港原來真係有好多靚嘅地方，好有歷史價值。

一個咁舒服咁靚嘅地方我哋真係要愛錫佢，因為景象唔係一時三刻可以變出嚟，但係破壞就只需幾秒鐘。

以後我哋真係要好好愛護大自然，等依啲靚景可以一直長傳落去！