裝修中左幾多伏,好多時都要住落一年半載才慢慢發現。

以下結集了一些「裝修入伙交流會」中,戶主的分享。大部分圖片都是入伙後一年多的照片。篇幅所限,介紹幾點貼士俾大家:

 

1. 圖二展示的,是鋅盤邊的處理。或曰「盤蓋石」還是「石蓋盤」。右圖可見,盤蓋石用玻璃膠修邊,時間一久就會發霉。這不是漂白水可以處理到的,而且這樣做也不好,成日乸佢會甩膠。另外,右圖亦可見一些質素一般的仿石的「花面」程度。雖然只在近看和反光才見到花痕,但對於有追求的人來說,corian石用落真係會靚好多。

 

2. 圖三展示的,是石英石接駁位在close up拍攝下的污糟情況。講真,接駁位是否顯眼屬見仁見智,但肯定的是很少人會特別清潔打理這些駁位。所以戶主有兩點可以留意:第一,用深色的石英石,駁位用落冇咁覺眼;第二,諗廚房台面點分配時,接駁位最好不是易污的位置。

 

3. 圖四展示的,是鋅盤的易花程度。一句講哂:你買時越「令立立」,用落就越易花。反而一個幾百蚊的啞面鋅盤,用落真係唔會點覺得花。

 

4. 圖五展示的,是石盤。又係讚corian石的時候啦。一般用石盤,都係會食色唔靚既。一係你唔好成日煮食;一係你就預左勤洗。右手邊是一般盤的情況,左手邊是corian用左年幾的情況。注意,佢唔係唔食色,未清潔一樣會有啲黃。但程度較低同埋較易清潔。

5. 最後一張圖是花崗岩(granite)的廣告相。冇乜特別,見幾靚咪俾大家睇下。戶主話,一個雙盤價格大約三千尾。

 

以上是戶主們分享的簡單整合,慢慢會越寫越好的~ 

有乜寫得唔啱,敬請指出。交流是防伏的基礎。

(除了一種人,版主是見一個block一個的,就是那些個個post都追看,免費學習後又批評你分享呢啲伏位多鬼餘。不懂appreciate不要緊,但又要追看,又要態度賤賤地吐槽發問..….其實呢啲人兩年幾黎都係得三幾個,希望佢地見到會慚愧一下~)


 【第350伏】裝修後一年... 廚房台面篇! (裝修中伏大全)

 https://www.facebook.com/hkdecoman