【尖沙咀小店串燒】$10 玻璃豬 好食到停唔到口！

我最初以為「捌拾胡同」是厚福街新開串燒店，誰知負責人之一的Matthew說:「我哋係坑口做咗好幾年，因為加租，7月1日先搬過嚟尖沙咀啫。」

正當我們思考要哪款串燒之際， Matthew推介說:「不如你試試我哋個蝦子撈麵套餐，因為係我哋為尖沙咀新舖而諗嘅，個餐已經包兩串串燒，好多OL鍾意食，因為夠飽肚。」

招牌玻璃豬，招牌安格斯同樣$20兩串，真的不敢相信這裡是尖沙咀。 (旺角食一串串燒， 最平雞肉串都要$13啦，平到咁緊要？)

Matthew解釋:「牛同豬，我哋係新開張，無錢賺只賺你哋覺得好食，之後都會繼續嚟幫襯咋， 8月1日，我哋會做返$12串，賺返$2。」(但都平過旺角好多喎。)

(咩叫玻璃豬？) Matthew解釋:「其實緊接脢頭肉，豬的前半位置，半肥半瘦，爽而不膩，試過你就知！」

(哦！膊頭附近，真係食串燒都學到新嘢，正呀！)

先來試了安格斯牛柳粒，有鮮牛味又不韌，單單用鹽已經吊出肉味，非常清的口感。但驚喜的之後才來...…

「玻璃豬」果然名不虛傳， 難怪由坑口馳名至尖沙咀，完全甘甜軟嫩，肉與肉中間夾了少少油花，一口咬一口肉香慢慢滲出來！

心諗:「黐線…...咁好食」

SY:「爸爸！真係好好食呀！ 我想要多一串」，其實我們兩公婆分享一串怎夠喉？

「 Matthew...…整多廿蚊嚟！」

蝦子撈麵真的可以用來飽肚，但因為蠔油、沙嗲、花生醬汁搶了串燒的香味，所以下次叫Matthew少醬會更好，因為「玻璃豬」的原汁原味更配蝦子撈麵。

胡同真‧薯片($18)，混入紫薯及新鮮薯仔，紫薯較硬，薯仔片脆得多，而且即口即炸，新鮮熱辣，好有利東街卡樂B+的感覺。

阿太:「食薯片飲可樂，真係正。」

SY:「媽媽，我都想飲，忌廉都唔好飲」，計我話，只要一口汽水，一口薯片已經好好食，不過紫薯味炸過之後，不是太出，有少少失望。

不過，這小巷串燒超抵，又好食，總之你經過尖咀屈入嚟試過，就知乜嘢叫好嘢囉！

捌拾胡同

地址: 尖沙咀厚福街9號B鋪

開放時間：

星期日至四︰1pm-10:30pm

星期五、六及公眾假期︰1pm-11:30pm
電話 3704-7107

大仁生活