提到大家最掛住嘅一間餐廳，唔少嘅網友都會選擇美國嘅連鎖快餐店哈迪斯。但係其實除左呢間薯圈、西部牛仔飯都超級令人回味嘅快餐店之外，我地香港到目前為止有邊10家餐廳係最令人懷念，或者係你仲記得佢地曾經存在嘅呢？

不如小編就帶你睇下我地香港昔日10家非常出名，人人都識嘅食店啦！

10. 烤雞大王

烤雞大王？年紀輕嘅或者真係聽都未聽過架！原來喺80年代前某大美國品牌抵港之前，香港本地其實係有一間專食雞嘅快餐店，當中最出名嘅菜式就係香噴噴嘅燒雞。而且想當年，就連華仔都曾經喺鏡頭前面食過添呀！所以話佢真係重出名過K_C呀！

9. 東東雲吞面

講到做雲吞麵都可以做到有連鎖店而且超級出名，近年就有「方向記」啦！但其實早喺80年代，東東雲吞麵就曾經做到相當有規模，仲勁到可以喺電視台賣埋廣告吸客。但可惜嘅係喺00年左右，東東雲吞麵就已經因為水準下降等因素下相繼結業喇！

8. 農場餐廳

仲記得喺90年代嘅時候，一講到港式西餐廳就會諗起超級經典嘅農場餐廳，因為佢啲餐多數都係抵食夾大件，非常適合一家大細去食。雖然農場餐廳喺高峰期嘅時候分店多達50家，但由於遇上左97金融風暴，最終餐廳就喺老闆破產之後全線結業。

7. 金龍船

金龍船主打嘅就係手工點心、西餅，但亦都係呢個原因，佢地嘅食品都係較為高昂，並唔係一般市民大眾經常購買嘅一個品牌。亦由於價錢偏貴，因此當遇上03年沙士嘅時候佢地就首當其衝，最終都逃唔過結業嘅命運。

6. Krispy Kreme

冬甩其實喺日本韓國當地，都係一種超級受歡迎嘅小食黎，只可惜宜家喺香港要搵一間冬甩專門店，好似真係難左少少，近乎可以話搵都搵唔番。其實喺近近地嘅2006年，美國連鎖冬甩店Krispy Kreme係曾經出現過喺我地香港，但由於受到金融海嘯影響，市民消費力弱，最終Krispy Kreme就只好喺開業兩年後申請清盤，並且撤出香港。

5. 出奇老鼠

又有得食又有得玩喎！當年有邊個小朋友唔想去出奇老鼠呀！唔想去就真係超級出奇喇！除左有室內遊樂場吸引小朋友之外，出奇老鼠嘅pizza都係深得大人小朋友歡迎！雖然係咁但經過時間嘅洗滌之後，出奇老鼠最後都撤資離開香港市場，並且由歡樂天地取代左佢原有嘅位置。

4. 馬里奧餐廳

用得「馬里奧」呢個名，當然就係意大利餐廳啦！就算你未食過佢地嘅野食，你都一定會記得自己細個嗰時一見到個廣告，就會彈起扮意大利人講「Mamma Mia！」。至於馬里奧餐廳最終點解會消失呢？有說佢地係因為另一pizza餐廳開始興起，所以就喺同行互相競爭之下倒閉喇！

3. Wendy's

Wendy's最好食係乜野？當然係佢嘅薯條！而且除左佢地嘅薯條之外，Wendy's logo上面個紅色頭髮妹妹更加係家傳戶曉，真係發夢都記得佢個樣呀！記得又點丫～Wendy's最後都係因為鬥唔過另一家現在仍然存在嘅快餐店而喺06年撤出左香港喇！

2. 陽光一代

回想起小學時代，陽光一代曾經係小編超想食嘅午餐，一見到同學打開佢地個陽光午餐就好羨慕，好想掉走自己屋企準備個飯盒。陽光一代而家已經轉型，想回味嘅或者可以試下「波仔叮叮」系列啦！

1. 哈迪斯

排名第一仲唔係哈迪斯？一定係佢哈迪斯啦！薯圈、西部牛仔飯、蘑菇飯，一聽到就流晒口水喇！但無辦法啦因為租金同經營權問題，香港哈迪斯已經喺06年消失，要食或者最近要去其他東南亞國家先有得食喇！