【炭火紫菜包飯】韓國五強之一：巨龍燒肉包飯闖紅磡！

韓風凜凜...…老友告知:「紅磡又開咗一間新韓國嘢，話係咩韓國觀光公社選為全國五強紫菜包飯店之一喎。」

嘩！！來頭不少喎…… 一定要見識見識～

其實位置向大街，之前向附近保安問路...…他答:「直行啦，做乜最近咁多人問去嗰度？」(韓風真係勁！！)

結果，晚飯時間全場滿坐，不過門口不用排除，可以直入。韓籍老闆還會親力親為分配位置添。

即叫即包的紫菜包飯， 可惜店員不准我拍攝...…

SY:「我記得之前同媽媽去觀塘自己包過依啲飯嚟食。」(嗰日你倒瀉晒人哋啲飯吖麻...…我記得)

等候時間大約15分鐘，兩條手臂長的紫菜包飯便正式上枱. 全店有17款紫菜包飯，我們點了人氣No1炭燒豬肉紫菜包飯($68)、雙層芝士紫菜包飯($62)。

SY:「點解「炭燒豬肉」會少過「雙層芝士」一舊嘅？？」

我答:「係喎……不過人手切， 大細不一，應該條條都一樣長嘅」(細路又會咁心水清嘅？)

人氣推介絶非浪得虛名...…真心好好食！燒肉又夠香，配蔬菜絲、黃蘿蔔，愈食愈開心。

聞說因為食材係真．韓國貨，所以才非街坊價出售喎。(價錢平啲梗係好啲，不過都接受到嘅)

(小朋友邊款好食呀？)， SY:「雙層芝士...…(吓？ 你真係唔識食，你無炭燒豬肉，得舊餐肉咋喎？？)，我話有芝士好食，唔係我嗰條好食呀！」

我心諗:「無錯...…應該加第18款， 炭燒豬肉芝士紫菜包飯啦！！」

隨紫菜包飯會送上每人一碗味精湯， 不過算有少少心思， 加了蛋花...…

嫲嫲搶說:「加隻蛋，容乜易吖...…個湯十足公仔麵水， 個底仲鬼咁多胡椒粉添。」(乜妳仲奄尖過我？)

試完乾身的紫菜包飯，便來兩碗湯年糕、辣炒芝士年糕泡麵($78)，連吃得辣的阿太也覺辣...…如果可以揀BB辣就好啦！！

早知不要貪心玩拉芝，因為可能店內冷氣較大，湯麵很易放涼，結果沒有混入的芝士，變了一大堆如煮老了炒蛋。

SY:「爸爸， 唔好畀我食呀！ 頭先我嗒咗一啖都頂唔順， 如果要我食，真係會辣死得架。」

年糕餃子湯...($78)， SY說:「畀八方雲集細咗啲，不過依度有年糕，好食好多。」

我:「你唔覺個湯好鹹咩？」

SY說:「我都無要啲湯，但我鍾意食偏偏依個年糕，長長嗰好辣。」

今次故事又教訓我，人家一早說是韓國五強紫菜包飯店，我來點湯麵，湯年糕...…即係去Pizza Hut點飯食，一定不及食Pizza啦。

利申:我係港佬， 愛食港版厚批Pizza！

CHARLES炭火紫菜包飯
地址：紅磡必嘉街104號紅磡灣中心地下20號舖

大仁生活