【食譜】完全餐廳的味道與水準！焗豬扒飯

我喜歡食大家樂焗豬扒飯，過去做過、寫過好多次焗豬食譜，但個汁都爭少少，又唔明爭乜。

今日好認真去整焗豬比包包食（其實每一餐都認真），尤其假期我通常唔煮，比包包出街跟大人食，之後就要乖乖食屋企飯。

又深明個仔喜歡濃味食物，我都唔會逼佢食無味食物(但朱古力、糖果、零食係禁品)，想佢食多啲、開心啲、煮得好啲。

估唔到今次個醬汁做到90%相似，原因過往我一直只用茄膏去整，但原來加少少茄汁，整體個味就不同了！！

同埋豬扒只需要用鹽、蛋白及生粉去醃，做出來豬扒較軟熟，又唔會過多醃料令個飯有其他味撈埋。

當然……包包媽咪唔係流的，喺醬汁入面加入紅蘿蔔粒及洋蔥粒，佢唔覺唔覺就食埋，哼～

份量：2人(我將個份量寫大佢，因為我相信通常一煮就一家大細都食)

材料：

豬扒   2-3件 (醃料：鹽少許、蛋白半隻、生粉半湯匙，順序撈勻佢)

飯   2碗

雞蛋  2隻

番茄  2個

洋蔥  半個

芝士   隨意

醬汁：

茄膏   2湯匙

茄汁   1湯匙

鹽   少許

糖    1湯匙

水    大半碗

麵粉   1.5湯匙

做法：

1. 剩下蛋液用來炒飯，熱鑊熱油倒入蛋液，加入飯快手炒勻，可以加少少鹽

2. 豬扒醃好後，沾上蛋液去煎，煎到半熟或微金黃色便可以

3. 番茄、紅蘿蔔、洋蔥粒爆香，可以另加一粒蒜頭

4. 然後分兩次加入麵粉兜勻佢，加入茄膏兜勻分兩次慢慢加入水煮滾

5. 加入茄汁、鹽及糖，試味後煮至開始杰身便可以熄火

6. 汁淋上豬扒及飯，灑上芝士用200度焗爐焗10分或以上及芝士溶後呈金黃色

(漏了影豬扒既相，我煎完後剪好晒成粒粒方便個仔食，最後佢只食淨番茄皮呢~)