有外形嘅男士就一定能夠吸引異性，一定會有女朋友？當然唔係絕對架啦！例如就算你幾好樣但脾氣勁差，人格又有問題，咁就一定唔會令人欣賞你，更莫講話要人地成為你嘅另一半！更甚嘅係假如你已經踏入社會，但仍然對前景無任何目標，咁亦都會令你嘅對象缺乏安全感。
唔想成為大家眼中嘅「廢男」？咁你就一定要睇實以下10個缺點，確認一下自己唔會錯犯喇！
1. 第一次約會就AA制
自己第一次主動約對象出街，食完飯之後太過君真要求對方分擔帳單以AA制付款。對於唔少女士黎講，咁樣嘅做法其實會令佢地覺得你好小家，好似咩都根根計較唔夠大方。
2. 無人生目標
對人生訂下目標其實係每一個人都應該具備嘅特質，假如自己都唔知道自己想點樣活下去，只係識得毫無方向咁隨波逐流，咁當然就唔能夠為自己另一半帶黎安全感，未能說服佢地同你一齊喺毫無目的之下浪費埋下半生。
3. 唔夠獨立
太過痴身呢個缺點絕對唔係女士獨有，而假如男方都係咁經常痴住另一半嘅話，當然另一半自然都會感受到一定壓力，同時令佢地覺得男方對於自己任何事同人際關係都會插手干預，好無自由。
4. 唔撐自己另一半
當遇上某啲對立嘅事件嘅時候，作為男朋友嘅你雖然心入面係支持佢，但為左令雙方都好過啲，你就唔表態支持撐自己另一半。雖然你嘅出發點係想要以和為貴，但對於唔少女士嚟講咁嘅做法反而係縮骨嘅行為，會令佢地覺得無受到你嘅尊重。
5. 優柔寡斷
已經作為左成年人但仲係唔識得為自己作出果斷決定，呢個缺點當然係會你形象受損，因為咁嘅行為就只反映到你毫無自信，而且判斷力差劣。
6. 對陌生人無禮貌
出街時候好似當正自己係大爺咁，要人地服侍自己之餘更加對人無禮貌，咁唔識得尊重人又點會得到人地尊重，人地見到你都會驚比你鬧埋一份，即刻調頭走啦！
7. 對所有野都無任何動力
做任何嘅事情都踢唔郁、提唔起勁，令到機會一次又一次失去，咁樣嘅缺點其實係會令你喺感情同工作上都無任何進步，並且令你同其他人比下去。
8. 經常抱怨
無論事無大小都必定會怨天怨地，就好似啲人講「M到」咁嘅款，咁唔識得咩係承擔嘅人到時點會擔得起頭家？
9. 講野轉彎抹角
因為怕事而講野轉彎抹角、唔夠直接，其實都會令人覺得你好無自信。
10. 懶散唔做運動
成日都屈喺屋企掛住玩電腦，無運動嘅習慣令到身體虛弱，行條斜路都喘晒氣。咁樣對於女士嚟講真係會好扣印象分。
