【觀塘工廈任玩任食】$88懷舊放題三粒鐘

一聽到食自助餐，阿囝即時興奮大叫:「好嘢！」不過，今日觀塘工廈餐廳供應的，嚴格來說只可以叫小食放題。

$88任食3小時， (周末$98)， 來這裡主要貪可以有玩具玩. 阿囝:「咁好嘅？3個鐘頭都可以玩？」(食飽先准玩呀！)

一走入門口， 就有攤位遊戲王牌「電流棒棒陣」...…

阿囝隨手拿起電棒，在鋼條中穿梭自如:「爸爸！你睇我...…完全無響紅燈」(梗係啦！！你都未開電掣。)

老翻紅白機配14吋Konica舊電視，少有機會玩電視遊戲的SY顯得很興奮:「哎呀！死咗...…原來要揼斧頭架。」

我問小朋友:「你唔覺得個電視矇查查咩？」

他雙眼死叮實14吋螢光幕答:「少少啦！不過好好玩，好刺激喎。」估唔到30年前我迷戀的，千禧後的小朋友一樣鍾意。

以80年代做主題的餐廳，食物質素...…亦十足從前學校小食部一樣，有得食，食得飽，但真的不能與「好食」拉上關係。

全部(幾乎)也是叮叮小食，龍蝦丸、貢丸、菠蘿腸仔、沙律，似炸完又炸的餃子。

即時加熱即食的雞肉串還有麥樂雞，SY最愛一口西多士，這個算是最有製作水準了吧？

阿太:「$98食啲咁嘅嘢，真係好賺。」(會唔會我哋太老呢？)

阿太:「你睇其他人都係嚟捉棋，玩啤牌，咁同上樓Cafe都無乜分別，任食...…你睇無乜人叫完再叫吖？」

(咁...…個西多士都入到口嘅)

「飛行棋大王」又迫我玩....…

我:「屋企都有飛行棋啦，駛乜嚟依度玩呀？」，大王回答:「唔同，依度有嘢食呀！！(但你食咁少嘅？)，都唔好食，唔好問啦...…爸爸！ 到你行啦。」

簡單看看小朋友，玩釣魚機，玩捉棋，玩鐵皮雞仔，這位小朋友真的天生很愛玩...…

最攪笑係我介紹黑白俄羅斯方塊機給SY:「以前爸爸坐車成日玩架」，SY:「點解無顏色嘅？」，不過小朋友同樣玩了4-5關才放棄。

懷舊不死，在場年青人真的玩到嘻嘻哈哈，可能大家都只想找個聚腳點。食物質素，可以填飽肚皮就得吧？？

$88可以任點任食任飲任玩舊時玩具，11:30玩至14:30，三小時過去，覺得發現新大陸的SY:「咁快夠鐘嘅？ 我唔想走呀！ 好好玩...…」

不過，不足半小時，阿囝:「爸爸！我好肚餓。」(又難怪，有時有啲食物真的不應該入口，於是我們情願又走去美心下午茶囉。)

懷舊任食任玩:
星期一至五：14:45-17:45 ($88)
星期六和日及公眾假期：第一輪：11:30-14:30；第二輪：15:00-18:00 ($98)
(好彩6月有9折)

開餐達人
地址：觀塘開源道47號凱源工業大廈1樓B室
營業時間：星期一至日：06:30-22:30

大仁生活