誰都自我感覺良好

做人，讀下書都係緊要既。 

網路上面既人，成日都話本土派只係口頭勇武，鍵盤戰士，又唔見佢地真係動刀動槍去搞革命。而被稱為左膠既人呢，就經常被本土派取笑，只會在網上自我感覺良好，不會做實事。 

比如，最近有人就指香港的杯葛行動，跟Lancôme的股價扣上關係，指法國Lancôme 總公司萊雅的股價，因為香港人的「杯葛行為」而下跌一個百分點。更有報章話，唔好睇少 1%呀，都好多錢架之類。但係，之後當股價反彈既時候，又有冇新聞報呢？而歐洲股價下跌，係咪真係關你香港事呢？而家係歐洲股市，最熱既話題，係英國係咪脫離歐盟，英磅匯價亦因為咁樣有大波動。簡單Ｄ黎講，萊雅既股價，都好有可能因為英國同歐盟關係影響。 

點解傳媒會咁樣報道「萊雅」股價呢？點解佢地會無視邏輯，無視理性，將兩件可能有關係又可能冇關係既事拉埋一齊報道呢？冇既，傳媒咁做，目的都係想「證實」香港人遊行仲有用，杯葛仲有用。但係，得罪講句，咁多年黎，香港人搞既杯葛，由大家樂到李氏既地產霸權，有邊次成功過？有邊次搞死過大品牌？講杯葛，罷食罷買罷用既，本來就唔用架啦。早排，都有人話要罷坐地鐵，罷睇ＴＶＢ架。地鐵咪又係日日人迫迫，ＴＶＢ收視跌極，咪仲係有十六、七點，係百幾萬人？ 

講到底，要自我感覺良好，係唔分黨派既。大家都係人，都係想要成功感，真係唔使分得咁細。