平時番工瞓得少，到放假時又瞓唔著？睡眠時間同質素好影響我地日常工作表現㗎！想瞓得好又瞓得夠？即睇以下5大睡眠貼士！
1. 唔好賴床
如果想早啲上床瞓，最好嘅辦法都係每日要持之以恆咁早啲起身。較鬧鐘時亦都要注意，唔好短時間內逼自己早幾個鐘起身，應該循序漸進，每個星期早30分鐘起身，慢慢推早到理想嘅起身時間。另外，切記唔好賴床！當你習慣咗早起，你嘅身體自不然就會令你夜晚早啲眼瞓，所以就算假日期間都唔應該打亂平日嘅作息時間。
2. 遠離電子產品
夜晚啲時間如果用嚟玩電話、上網、工作，都會對身體構成不必要嘅負擔，甚至會影響身體產生褪黑素。想瞓得好，記住最少要喺瞓覺前1個鐘停止接觸電子產品喇！
3. 呼吸清新空氣
原來清新空氣同陽光係有助提升身體能量，而運動就可以幫人舒緩壓力同減低負面情緒。至於大家最愛嘅咖啡呢？專門研究睡眠嘅The National Sleep Foundation就建議，最好飲少啲喇！過量咖啡因始終對身體冇益！
4. 睡眠環境好重要
市面上嘅智能燈膽，可以根據周圍環境嘅光線變化而調節出唔同嘅光度，想更容易瞓著？可以試下臨瞓前較暗燈光。另外，想舒緩因為脫水而造成嘅疲倦感覺，可以喺床頭放杯水先瞓，第二朝一起身就飲咗佢。
5. 了解自己需要嘅睡眠時間
經常聽講每晚瞓7至8個鐘最適合，但係咪每個人都適合呢？專家就話，其實冇定律㗎！如果太過緊張自己嘅睡眠時間，反而會難令心情放鬆，會有反效果㗎！如果大家保持身心健康，又冇失眠問題嘅話，而每日都喺差唔多時間起身同瞓覺，咁就即係夠瞓㗎喇！
