【清熱解毒】赤靈芝羅漢果茶

早前朋友仔送左包有機赤靈芝片俾我，我諗左好耐都唔知用嚟煲咩好，最後就請教藥材店嘅店員。

佢就教我簡簡單單咁用赤靈芝加羅漢果嚟煲茶，咁就已經係清熱解毒，我當然就即刻返屋企煲啦~

赤靈芝屬性平，有助養心安神、補益氣血、止咳平喘、改善食欲不振及消化不良。雖然有用途好廣亦都係好有益，不過就味道帶點甘苦，所以直接焗茶煲水飲就比較難 入口。所以就可以加入羅漢果一起煲，因羅漢果本身有甜味，可以中和赤靈芝的苦味。

而兩者一齊煲的話，既可以清熱解毒，亦對肝臟好，更加可以增強身體免疫能力。

材料就只係兩樣：

赤靈芝片約15g、羅漢果1個

做法：

1. 赤靈芝片水浸洗一陣；羅漢果壓碎

2. 煲內放入4L水，然後加入赤靈芝片及羅漢果

3. 待滾後，加蓋轉小火煲一小時

4. 熄火後就要即刻夾起啲材料，因為如果浸得耐，個茶既苦澀味就會重喇！

5. 待涼後入樽，放入雪櫃就飲得~

其實我初時都好擔心赤靈芝個甘苦味會好重，不過最後只係初入口時有點微苦，飲落都唔覺得有味，就連小小豬都肯飲就知應該唔難飲啦~

可以一星期煲一次赤靈芝羅漢果茶，放入雪櫃當水飲用，我都係嗰句……

飲有益嘅涼茶好過飲冇益嘅嘢啦(雖然……我都仍然都係好愛飲檸檬茶，努力改善中)。

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，睇下呢個湯水啱唔啱自己呀！

BY 小小豬的成長日誌