夏天街外面真係好熱架！所以好多時候一大朝早番工都會好想快啲番到公司，咁就可以有冷氣嘆下，等自己無咁辛苦。但講還講雖然一番到去嗰一刻係會非常舒暢，誰不知坐喺度做做下野，涼番個身就覺得越嚟越凍，到下晝仲會慘到好似坐喺雪房咁！積積埋埋一日復一日，唔知點解自己做起野嚟表現都越整越差。
唔通真係關冷氣凍嘅事？
▼太凍會減慢工作進度▼
工作環境太過寒冷，其實亦都會搞到班同事好似進入左冬眠狀態咁工作效率大降。主要原因係因為感覺到寒冷嘅時候，人體就會出於本能咁不由自主尋求取暖嘅方法，令您個腦只係顧住研究飲番杯熱茶好定將自己隻手夾緊身體。而且凍起上嚟，打個字都手指僵硬啦，又點會有效率可言呢？
▼太凍會儲肥自己▼
長時間坐喺幾呎範圍裡面埋頭苦幹，走動時間極少，本身想瘦都已經好難。然後在加上外國網站《每日健康》嘅研究顯示，冷氣其實係會令身體處於適溫狀態之中。而喺咁嘅氣溫中工作，人體就自然會覺得無須燃燒體內卡路里，更反為會想食多啲啲添！
▼太凍會覺得唔開心▼
香港人性格外冷內熱？唔一定架！根據2008年《科學》雜誌研究，人體溫度其實係同人際關係有所聯繫，發現工作環境越凍嘅人待人接物嘅態度都會較為遜色。所以假如您發現自己嘅同事成日都面黑黑咁，或者你可以試下調高番冷氣溫度睇下有無明顯變化。
▼太凍會容易犯錯▼
工作環境唔夠舒適，除左會影響效率之外，更加會提高犯錯機率。康奈爾大學嘅研究顯示當員工處於低過20度嘅環境之下，出錯嘅機會率竟然會比處於25度嘅高出44%。咁樣即係話如果您下次比老闆鬧做錯野嘅時候，您就可以答佢係因為冷氣太凍先會搞成咁。喂，小編都係講下架咋，千祈唔好同老細咁講呀！
