正常？咩黎架？食得架？

老老實實，喺香港生活，得罪講句，有邊個係度追求正常？

好似環球時報搞何韻詩事件，而家上到國際版，或者真係求仁得仁啦。就2016年4月左右之嘛，中國外交元老、前駐法國大使吳建民就聽講呢，喺啲內部演講同論壇度發炮，批評某啲內地傳媒及評論人，好似《環球時報》、解放軍少將羅援等仍帶着戰爭思維，添煩添亂。點知呢，而家又見到借何韻詩事件，去講境外藝人係咪有份參與藏獨既事啦。

喺二月果陣，其實同一張報紙都已經講過，話梁朝偉、舒淇、王菲等人係印度法會既時候，同西藏流亡政府高層同一場合露面，係打著「明星」同「自由」既招牌搞搞震。

佢地既說話，講得好明白架啦。而家你喺香港人既地方，就係食緊中國飯，你就唔好搞咁多野。呢樣野係咪正常既呢？咁就要問下，而家香港人，有冇讀基本法，信唔信一國兩制啦。一國兩制呢，國防同外交呢，就同香港冇關既。因為香港冇辦法理呢啲野，而且，我地更加冇次主權，所以呢呢啲野應該唔關我地事。有藍絲督察學生仲「好心」提點我，話：「如果立左廿三條，你以為你見達賴可以咁隨便影相放上網？」

咁有好多野，我唔知咩叫正常啦。

你知啦，好多人就教我地，要學中國文化，要飲水思源，要信恩情，要有義氣。食邊家飯就唔好搞事。中國人，最大既人權，就係食飯。左膠都係咁講架，幫窮人既明哥就最好啦，因為佢派飯。對好多香港人黎講，食飯係最重要既正經事，發生呢啲事情，好易明白。到今時今日，我唔係第一次講呢句架啦：市場係會令人扭曲，令不正常變正常。以前，正常人係唔需要咁多對鞋、咁多套衫既。以前，正常人賺錢呢，係要付出勞力，而唔係炒樓等時間過等佢升值賣左佢，或者係放租畀人等人地同你供既。以前，正常人放工呢，返屋企睇下電視就係最滿足既娛樂。以前，啲人用英文學英文，用廣東話學中文既。以前呢，窮人都入到ＤＢＳ既，唔會上品無寒門。正常？咩黎架？食得架？