「一日之計在於晨」除左係用嚟形容大家起身嘅嗰一刻之外，其實亦同時代表左大家每日番到公司都要調節嘅一個心態，需要令自己喺最佳狀態迎接每一日嘅工作。而喺番到公司嘅一刻，大家平日又會首先習慣做啲咩野先嘅呢？
雖然番工好似日日如是，好似已經習慣左同一個做法咁，但其實原來根據研究，踏入公司頭10分鐘所做嘅行為就係你當日工作嘅質素指標。想每一日工作都稱心如意，能夠一一應付，或者您就要留意下面嗰8點避免錯犯喇！
1. 飲咖啡
好多人都習慣喺一日工作之前飲番杯咖啡提提神，但研究卻發現最佳飲用咖啡嘅時間，其實係過左每朝9點半之後。由於人體內控制能量嘅皮質醇通常都喺早上8至9處於高峰狀態，因此喺9點半之前飲用咖啡就會令身體依賴咖啡因，而減少製造皮質醇。一旦身體無左咖啡因輔助，人就自然會覺得疲累，無精神工作落去。
2. 遲到
除左要從自己精神上考慮番工習慣如何影響工作表現之外，同一時間自己比人嘅印象亦都好影響接落嚟一日嘅工作。如果您喺嗰一日遲到，又比老細見到，一陣佢下晝有咩搵你幫手就有機會令佢諗起你今朝遲到嘅畫面，令您喺佢心目中立即扣分。
3. 即刻覆晒所有email
因為隔左一晚，唔少人番到公司第一時間就會衝去回覆晒手頭上嘅email，無論緊急與否。對於呢種看似非常勤奮嘅習慣，著名作者及國際經貿演講家Michael Kerr就表示更重要嘅其實首先分清重要同唔重要嘅email，覆左緊急嗰幾封先，之後先用剩餘嘅時間處理其餘email。
4. 無諗清楚今日要處理啲乜野工作
一日工作開始嘅時候，最重要其實就係為自己訂下目標，了解今日自己需要處理乜野嘅工作項目，並將時間好好分配。咁樣做就一定唔會做漏任何工作，又或者令自己忘記左要開會而被逼放低一份急住要嘅project。此外，好好訂下工作目標亦都可以令自己喺目標時間之前完成工作，避免出現一日拖一日嘅情況。
5. 開會
一大朝早開會某程度上係會浪費左大家早上滿滿嘅精神，因此較為需要集中力嘅文書工作其實係會較為適合。如果會議並唔係非常需要動腦嘅話，最好都係安排番喺中午，即係大家集中力較為低嘅時間先至舉行。
6. 做左容易嘅工作先
人最有集中力同精神嘅時候，就係每一日嘅早上，而喺每日時間慢慢渡過嘅時候，精神狀況就會慢慢低落，因此越早應付較艱鉅嘅工作反而係更為合適。而且更加可以令人喺放工嘅時候唔會將緊張心情帶走，可以輕鬆下班休息。
7. 諗住負面嘅遭遇
搭車嗰時比人刻意撞傷，仲要對方惡人先告狀，話番自己轉頭令你好唔順氣？都已經過左去啦～唔好再諗咁多喇！根據研究報導，如果番到公司都仲未放低之前留下嘅負面情緒，其實都好影響到工作表現，所以都係喺正式做野之前將唔開心嘅事暫時收起吧啦！
8. 一心多用
有人會覺得識得Multitasking咁一心多用係件幾好嘅事，令您可以同時處理唔同嘅工作，節省時間。但其實如果你喺剛剛番到公司無耐就開始一心多用，同時處理多項工作嘅話，咁其實反而會令您更快耗盡自己嘅精神，令自己工作效率及質素下降。
