尋日介紹個四個開工加速攻略，相信今朝試完大家已經快手唔少，又或者當中有啲你地未必做到。不過無緊要，今日筆者教埋你呢外四個口訣，總有一個啱你用。
5.聽歌有助工作效率
假如有人話：返工聽歌會影響工作效率的話，果個人一定係個白癡。只要你係一個只有電話響、或者鴉雀無聲嘅辦公室裡面，人嘅注意力反而會因為沉悶而變得分散。反而用耳機聽歌就係一種影響最少，但又最能夠為員工解悶方法。
當然你想話班staff戴著Headphone，就會聽唔到你叫佢。咁點解唔試下的起你個屎忽，行過輕輕拍一拍佢。又或者利用一樣偉大嘅科技叫Skype、email或者Line，等佢對著個電腦都見到你講野呢？
P.S 員工們，為免分心，請預先設定好一個Playlist，就算係Youtube都可以預設一個播放列表。咁樣你就唔使成日click來click去揀歌喇。
6.簡短到位就是溝通的藝術
好多時大家會發現，係email或者whatsapp回同事或者老細野，都會見到好多人reply到水蛇春咁長。所以想要加快效率，最好方法就係講野講重點（但又不失禮儀），即係唔好扮婉轉、扮有禮。要人做咩就直接同人講做乜同點解要做（再加句唔該），唔得的話都簡單講埋點解。
因為睇email或者短訊，同聽人講野一樣道理：人要聽晒你講晒每隻字先知你想做乜。所以你不斷加一堆修飾詞彙落去，人地只會花多咗時間去搵重點出來。所以為節省大家時間，簡短講重點先係最好溝通方法。
7.視自己做事方式去執檯
呢個建議，可能係筆者唯唸一無標準嘅方法，呢樣就係執檯。因為有人會覺得，只要張檯一乾二淨，個人就可以有更多空間去俾雙手活動；但另一方面，亦有人好似筆者一樣，覺得任何野都放係手邊，雖然亂小小但都可以快手搵到經常用嘅野。不過話明係要加快開工效率，自然就係以自己最順手個做法為主，唔係強逼自己做唔就手嘅野，反而會弄巧反拙。
8.Office最緊要夠光
其實返工最重要一樣野，就莫過於Office要夠光一樣。當然正常Office一般都以經達到標準。但係假如你係Home office又點？咁最重要一樣，就係唔好賴有型咁剩係掛排鴨寮街買嘅掛燈就算。好似筆者咁樣，就算間房好似黑房一樣，唯獨係做野嘅電腦檯都一定要LED燈照明書檯部份。
因為燈光越暗，雙眼就會加速疲勞、從而引起各種分心情況出現。所以工作環境夠明亮，都係最影響工作效率一環！
