係香港,真金白銀就最誠實。講咩都係假,香港人,最在乎就係錢。

六四晚會,支唔支持,點唔點蠟燭,係咪存在就等如已經革命,好多香港人都唔關心。

講到底,係現實世界生存,咩都係錢,咩都要錢。冇錢,就咩都唔使講。六四,可以為政黨帶黎幾多錢呢?六四事件27年,係銅鑼灣E出口到維園,全條街一條大直路,都係各式各樣既街站。結果,邊個係籌款冠軍呢?

香港眾志主席羅冠聰話,佢地籌到45萬,而政團之中排第一。

排第二既係公民黨,籌到28.7萬,但都少過上年既29.9萬。

而到處都係「撐長毛,請捐款」直幡既社民連,都有22.6萬。而工黨籌到9.5萬,新民主同盟籌逾6萬。

而心水清既網民睇到呢段新聞果陣,都不禁質疑,原來一年幾度既籌款大日子,都只係籌到45萬。根據香港眾志早前係網上公佈既數字,香港眾志既恆常開支,一個月需要十七萬,咁四十五萬,真係唔夠三個月用。加上搞一次選舉,最少要二百萬,香港眾志係咪真係可以成功參選?我估佢地自己都好有疑問。

咁諗深一層,如果香港眾志佢地真係好有信心要參選,我相信佢地一早就上黎我地既未選先戰環節。

而睇住呢D籌款數字,唔少網民,都引用社民連長毛梁國雄議員既一句名句:「用革命嚟做幌子去叫人投佢一票嘅人係食緊人血饅頭……用60幾人被捕去做嘅選舉運動係人血饅頭!」,想問長毛,用六四事件去籌款,係長毛心目中,又係咪人血饅頭咁話喎。

不過,咁講就好衰既。長毛咁多年,已經係泛民之中,人前人後最唔虛偽果個。成日拎住佢一句做佢,D網民又係衰衰豬既。總之,如果我係眾志,我都好擔心。六四得四十五萬,七一又最多四十五萬,剩係夠佢地平日營運開支,咁邊度黎錢搞選舉呢?



 https://www.facebook.com/kengopage