唔識焗蛋糕？唔緊要！學整簡易版banoffee吧～

我呢個星期好忙，忙到未有新食譜出到，但我又不甘個blog寂寞，可惜我實在分唔到身。

嚟緊仲要包幾十隻粽，有時間都想休息一下，咁就睇下有乜食譜可以翻用，原來大少爺個生日蛋糕未出過食譜。

呢個係簡易版banoffee，裡面係焦糖醬加香蕉，個面加cream好好食既一個蛋糕，但其實佢好容易整得到喎。

唔識焗蛋糕既山頂朋友都可以做多啦A夢變個蛋糕出來。

焦糖醬 (早一晚整)　材料：

糖                  150g

水                 40g

牛油             30g

淡忌廉          150g

做法：

1.糖入小煲中。

2.加水，開始用中火煮。

3.開始起泡泡就要留心睇喇。

4.邊煮邊攪，開始轉色就要小心，唔好煮過火，呢個時就可以離火，即係移離爐頭，否則餘溫會繼續令糖漿溫度提升。

得些好意需回手，大家唔好煮太耐，見佢轉金黃色好離火，否則會苦的。

5.離火後加入牛油，此時會狂起泡泡，大家要小心啲，牛油溶晒後就加淡忌廉

6.再攪勻就變成醬，當個醬仲熱時會比較稀，但凍後就成醬，放入樽後放雪櫃可保存一個月。

餅乾底　材料：

牛油溶液  60g

消化餅    150g

做法：

1. 將餅乾整碎，加入牛油溶液撈勻，放涼可以壓入模。

2. 香蕉大約2隻切片，撈入焦糖醬可以防止變色。

3. 再倒啲焦糖醬上面。

4. 最後用100g淡忌廉打起，唧上面便完成呢，呢個蛋糕好容易又好味。

做生日蛋糕不是夢啊！～