行左入房但唔記得自己要拎啲乜野，又或者係明明以為自己瞓醒左仲已經去左刷牙，點知自己原來仲瞓喺床上面？究竟我係唔係患左腦退化症，又或者自己靈魂出竅？係唔係真係傻左呀？
但對於呢啲個個人都曾經經歷嘅奇異狀況，科學上又有冇確實解釋嘅呢？
1. 想像出恐怖嘅情節，例如從高處墮下應該點反應好
有時候無端端望住窗外，突然就會諗到假如自己從大廈天台墮樓，自己可以點做先好，又或者無緣無故又會想像下將人推出馬路究竟會點。雖然呢啲想法非常黑暗仲非常恐怖，但唔講真係唔知原來係種正常諗法黎。對於呢類型嘅暗黑諗法，研究就指出實情其實係我地曲解左自己嘅求生本能。例如不斷想像跳樓會係點，真正所代表嘅係你非常想生存落去嘅想法，而並非想終結生命。但當你一個人無法將呢種想法掃除，無法控制自己思緒去諗番啲正面嘅事情，咁反為就代表左你有機會患上左強迫症或其他情緒病。
2. 入到房唔記得自己要做咩
呢個狀況相信好多人都曾經試過，明明入去之前係有啲野做，但入到去又唔記得左自己想做啲乜，搞到以為自己有腦退化症咁。人之所以會喺去到另一個場所之後，忘記左自己要做啲咩，原來全因受到屋企嘅門框影響。喺我地嘅腦部入面，記憶其實都會根據處所嘅空間分類，並將發生喺特定處所內嘅事件同地點聯繫、儲存。所以當人從一個房間走到另一個房間嘅時候，記憶就因此有機會被干擾，導致短暫失去記憶嘅情況。
3. 無心工作
出過黎工作嘅應該都會知道，有時候明明自己做緊手頭上嘅工作，偏偏隻手就會不期然拎起手機上下Facebook，之後先至番番去做自己原本做緊嘅工作。根據加州大學嘅一項研究，原來當人從原本嘅工作轉為做另一項工作，佢地平均就會花25分鐘先會做番之前做緊既野。而我地經常所提到嘅「multi-tasking」，實際上亦就係形容緊呢種狀況。此外，另一項研究亦指出假如工作上出現突發情況，令你要急需處理左最新一樣工作先，你嘅工作效率同質素其實係唔會下降，而且進度更反為會較快。但當然出現咁嘅狀況，所遇到嘅壓力亦都會較高。
4. 講講下野講唔出想講個字
講野嘅時候突然個字去到咀唇邊，但總之都係講極都講唔出，有時真係會人都癲。對於發生呢個現象，科學家則將原因歸納為直接或以推理形式存取記憶出現失誤所導致的。假若係因為直存取記憶出現失誤，咁即係意味左記憶同記憶之間嘅溝通橋樑有著弱點，因此令人從腦內其中一點走到下一點，無法憶起承接落去個一個字詞。
而假若狀況係因為推理出現失誤，咁就即係話大家根本都唔知自己想講咩字，但就因為喺腦裏面諗到少少關於嗰一個字嘅記憶而繼續追尋落去，跌入無限推理出字詞嘅深淵，造成講唔到真正用詞嘅現象。
5. 發白日夢
坐坐下喺度個腦突然空白左，人地叫你先回過神嚟。唔係下話我啲集中力真係差成咁？原來根據2012年嘅一項研究，當分別兩批人都同樣被要求為一件物件諗個特別用途嘅時候，被要求喺限定時間內完成實驗嘅想法係較為無創意嘅。相反，另一批能夠有時間發白日夢嘅，表現卻反為更加理想，能夠表現出富有創造力嘅一面。
6. 瞓著果下好似去左第二度咁
當瞓著果下，自己間房好似突然變成左第二個地方咁，突然發現自己置身泰國，同緊自己偶像漫步沙灘，完全唔係夢境一樣？原來呢個奇怪嘅景象，實情係一種睡前發生嘅幻覺，即係意味你當時嘅精神狀況處於半夢半醒階段當中。當我地從有意識嘅時候進入夢鄉，我地嘅眼球就會因為腦部仍在運作而快速晃動，造成幻覺。此外，一項2007年嘅研究亦都指出，我地瞓覺嘅時候腦電波依然活躍，同前者所產生嘅效果差唔多。亦因為我地有時係半夢半醒，所以有時候我地更能夠控制自己嘅夢境，發番個意識清醒嘅夢。
