台式珍珠奶茶向來深受唔少香港人歡迎，可以話係風靡全香港，只要踏出旺角、銅鑼灣呢啲旺區，總有一兩間珍珠奶茶店係左近，見到啲人手上揸住一杯兩杯唔同味既台式飲品嚟飲。呢啲曾經受盡唔少學生、OL歡迎既台式飲品，最近就有新搞作，實行要一杯兩味！
台式飲品以多款口味、選擇見稱，有時如果心思思想試勻哂咁多種的話，又要特登買多幾杯；但而家最新既一款台式飲品，就喺包裝上有個大改良，令你唔使再糾結飲邊款，因為可以一杯在手，最多可以試哂兩種口味，講緊既就係以下呢款雙包裝飲品杯「雙享杯」喇！
呢個「雙享杯」，第一眼望落去似係鴛鴦火鍋煲，一個杯分開兩邊，咁就做到一杯兩味既效果，除咗可以一個人獨霸，仲可以兩個人分開用兩枝飲管share都得，所以話，呢個設計絕對係超貼心！
雖然呢款咁特別既台式飲品店，係香港仲未見到有，但如果你等唔切的話都可以先去台灣朝聖，喺彰化或者台北新北市都有架，暫時仲係限量發售既「雙享杯」，售價只係台幣＄30 至＄60，即係HKD＄7.5 到 ＄15，值得一試啦！
圖片來源：台灣妞韓國媳,企ㄜˊ茶飲
