啱啱嘅農曆新年麥記就一如以往推出咗扭扭薯條，唔知大家會唔會年年都食一食應節呢？但其實shake shake薯條同「點Jack」先係小編嘅至愛！唔止呢幾樣，原來世界各地嘅麥記都各自有佢哋特色嘅產品，全部睇落都幾特別，想全部試勻晒！（注：哪有錢飛勻全世界？）
1. 意大利 Nutella漢堡
Neutella漢堡除咗Nutella醬之外仲有咩？就係滿滿嘅Nutella醬。
2. 加拿大 芝士肉汁薯條（Poutine）
喺新鮮炸好脆卜卜嘅薯條上淋上肉汁同芝士粒，香濃嘅肉汁加上溶緊嘅芝士，到底係咪發緊夢？！
3. 荷蘭 炸肉餅漢堡（McKroket）
用一塊牛肉沾上麵包糠，裡面加埋芝士拎去炸。外面香脆，裡面嘅牛肉、芝士融合埋一齊，再加埋黃芥末，味道一流！
4. 烏拉圭 鬆餅雪糕（Pancake Helado）
Pancake裡面包住焦糖煉奶醬（dulce de leche），上面加上一個雲呢嗱雪糕球，甜度爆燈！
5. 新加坡 扭扭薯條（Twister Fries）
呢個唔使羨慕人哋，因為香港一樣每逢農曆新年就會推出扭扭薯條應節！（但其實小編覺得扭扭薯條口感偏腍，唔脆得嚟份量又少……）
6. 新加坡 素脆漢堡（Veggie Crunch Burger）
麥記除咗關顧食肉獸之外，其實都唔會忽略素食者嘅需要。呢款以炸雜錦蔬菜餅為主題嘅漢堡就感覺幾清新喇。
7. 日本 Shaka Shaka雞
其實呢款就等如係Mega Size麥樂雞，再加一包特製調味粉，有檸檬、胡椒同埋芝士3種口味可以選擇！
8. 南韓 Churros
其實Churros即係西班牙嘅油炸鬼，當地人習慣會食佢做早餐，估唔到南韓嘅麥記都有得食！整法係將搓成長條形嘅麵糰拎去炸，表面再灑上糖粉。
9. 馬來西亞 招財福堡（Prosperity Burger）
又係農曆新年嘅產物！原來唔止香港有，所有有華人嘅地區都會推出類似嘅新年套餐應吓節（真係長見識）。往年嘅招財福堡都係以牛肉或雞肉配上洋蔥同黑椒汁，但今年麥記就搞搞新意思，加多塊薯餅上去！（感覺有點……伏，所以小編就唔敢試喇。）
10. 新西蘭 可樂冰沙（Frozen Coke）
用可樂打成嘅冰沙，感覺好冰涼啊！香港嘅夏天咁熱，係咪都應該積極考慮推出呢款產品呢？
11. 西班牙 豪華薯角（Patatas Deluxe）
細細長長嘅薯條換上特大薯角，薯味加倍，仲有12種醬汁俾你選擇！
12. 南非 McFeast漢堡
2塊牛肉加上椰菜絲、蕃茄、洋蔥同芝士，再淋上BBQ汁或者麥樂雞醬，整體配搭應該會幾好味！
13. 日本 抹茶Oreo麥旋風 （Matcha Oreo McFlurry）
嘩！呢個真係超邪惡，以兒家吹得大熱嘅抹茶風嚟講，喺本地推出一定會好受歡迎。（不如香港分店都再出啦好嘛？）
14. 巴西 芝士麵包（Pão de Queijo）
芝士控嚟到巴西嘅話可以試一試，做法係將一舊芝士釀入麵包球中，食嘅時候就食到又香又軟嘅芝士芯！
15. 香港 黑白漢堡
講咗咁耐，香港終於正式榜上有名！呢兩個「黑白相煞」分別配以牛肉同雞肉，推出嘅時候都引起唔少人嘅興趣，但食完之後似乎大家都覺得呢款包係「大伏」。
16. 印度 PaNas特色早餐（PaNas Special）
呢個印式早晨套餐似乎同香港嘅分別唔太大，最特別係佢會有個「米飯包」，另外配以炒蛋同炸雞。
17. 英國 吉百利朱古力蛋麥旋風（Cadbury Creme Egg McFlurry）
呢款吉百利朱古力蛋香港似乎就無得賣，但如果有機會去英國嘅朋友就可以一試呢個英國限定嘅麥旋風，唔知味道如何呢？
（圖片來源：buzzfeed、mercyswake）
