牌泄密

手機的相片太多，花了點時間去刪除一些沒有需要保留的存檔。

去到這一張，沒有刪除，因為有警世作用。

這張照片是我在四月十五號偷拍的，那天早上出席了由 Project Citizens Foundation舉辦的經濟論壇。這個論壇的講者粒粒皆星，包括財爺曾俊華、匯豐大班 Stuart Gulliver、股壇金手指謝清海。

但雄糾糾的講者陣容，到底跟照片中那個嬌滴滴的 Kelly 手袋有什麼關係？台上有政商名人，台下觀眾自然也是一樣的重量級。既有皮膚如少女般光滑的美魔女陳淑莊，也有耳珠吊著巨型紅寶耳環的貴氣大狀余若薇。

不過，讓我最眼前一亮的，還是要數坐在我前面的 Bonnie Chan。

未必人人認識 Bonnie Chan，但如果你做金融，尤其是 capital markets 這一塊，你沒有可能不知道她是誰。Bonnie 是著名跨國律師樓 Davis Polk 的合夥人，也是香港金融發展局的重要成員之一。

拍下這張照片的原因很簡單。

Hermes 的 Kelly 手袋，雖然有時候在 IFC 走兩個圈也可能見到一個半個，不是什麼罕有的珍品，但始終是一個有錢也未必買得到的殿堂級包包。有些女士不惜在米蘭站付出一倍 premium 買個全新的，有些女士買個二手貨回來也會視之如寶。雖然話英雄莫問出處，但從以兩個上途徑買來的手袋，已經大大 discount 了 Kelly 原有的貴氣。

從「正途」買回來的又如何？咁當然好啲，但都唔代表有貴氣。有啲人可以好架勢地紅橙黃綠各買一個 Kelly，然後 post 喺 facebook 嘅每張相，無論係食飯飲嘢，甚至乎張相係有人定冇人，都一定會隆而重之咁擺個袋出嚟：Caption 係「餐飯好好食呀」，然後張相係一張飯枱，一碟 sea bass，張凳唔係坐住人，而係坐住個袋。我唔知佢係個樣「靚得滯」唔入鏡，定係覺得個袋比個人更加重要，但我覺得 show off 得如此露骨好可悲，畀你做到 Hermes VIP 又點？

點先為之有貴氣？參考吓 Bonnie。

喺論壇場地裏面，Bonnie 一坐喺我前面，就好隨意咁將個 Kelly 袋擺咗喺地下。Kelly 袋見過好多，但像這樣一個被主人隨便放在地上的 Kelly，unforgettable。

但最過份都唔係個袋擺喺地下。

話說，去到前證監主席梁定邦大律師上台講嘢嗰陣，有位外國朋友由我後面走咗上前面，可能是嘗試坐近一點講者的位置。

就在他一個箭步飆上前的時候，竟然唔小心，踢咗 Bonnie 個袋一下，之後立刻一句 oh I am sorry。

雖然個袋唔係我嘅，但喺個刻，我個心離一離，然後立刻注視著 Bonnie 的反應。怎料，她只是淡然微笑了一下，說：「It’s alright。」果然係女中豪傑，畀人踢親個 Kelly，仲可以扮到咁鎮定。

外國人之後走開了，我期待著 Bonnie 會立刻拿起手袋，徹底審視一番，但她竟然絲毫沒有反應。除了眼尾看了一看自己的 Samsung 手機外，她全程只是一路點頭，一路望著台上梁先生的 slideshow。

Ladies and gentlemen，這個故事告訴你，用名牌，就要配上一份 couldn’t care less 的貴氣。

畀著其他女人，落雨嗰陣滴咗兩滴水喺個袋上面，已經面都青埋；個袋畀人踢一腳，仲唔當場失禁？

鄭伊健在「極速」裏的經典對白是，「人要惡過車」，不然怎樣 120 kilo 高速入彎？Bonnie 在論壇裏的警世示範是，人要惡過袋，不然怎樣駕馭 Hermes Kelly 這份欺負人的貴氣？

原刊於Plastic Public