無論坐短途機定長途機都好，話哂喺機艙入面坐幾個鐘，機上嗰餐一定要食好啲，但點解每次硬係覺得人哋揀嗰個餐好食過自己嗰個既……唔講唔知，原來揀飛機餐呢個動作都有好多學問，下次揀飛機餐之前記住呢9個秘訣，咁就唔會咁易中伏啦！

秘訣一：飯vs麵，一定揀飯！

飛機餐全部都係預先整好，上到機最多都係加熱，所以，即使飛機餐有提供飯或者麵時，麵條喺再次加熱之後已經變成一團好似漿糊既野；至於揀飯的話，都要小心唔好揀炒飯，因為炒飯喺第二次加熱之後就已經太乾，所以只有米飯喺加熱第二次加熱後仍然咁好味。

秘訣二：跟航空公司揀餐

唔好以為航空公司同飛機餐無關係，事關一啲航空公司為咗配合世界各地既客人，一般都會提供一中一西兩種選擇；但如果你搭既係西方既航空公司的話，自然西餐會做比中餐好，如果你搭既係亞洲既航空公司的話，中餐、本土料理就會好食啲。

秘訣三：識揀一定揀雞肉先

頭先講咗要揀飯先，至於肉類呢，就一定要揀雞肉先喇，咁係因為香腸好容易會變得又乾又硬，牛肉因為煮得太耐而好難咬，海鮮放咗咁耐亦唔再新鮮，咁所以數勻咁多種都係得返雞肉係最好既選擇。

秘訣四：有咖哩揀就記得揀

機艙係一個乾燥既環境，而當人喺呢個環境之下，味蕾敏感度會降低20%至30%，換句話講即係要食啲濃味啲既食物，例如咖哩，加熱後既咖哩可以保持順滑流動既口感之餘，亦唔會太辣，剛剛好刺激食慾。

秘訣五：素食者要注意既係……

一般情況下，每班國際航班上只會配少數素食飯盒，所以如果你係素食者的話，記得上機前就要訂定素食盒，如果唔係到咗登機時先講就嚟唔切喇。

秘訣六：記得主動問空姐拎酒水、零食

空姐推既餐車一般只係見到有果汁汽水，但其實一啲國際航班上面通常有更多選擇，例如啤酒、紅酒、白酒、香檳等，但有時需要你主動問佢地先得。另外，如果你搭長途機的話，當過咗餐時間而你又覺得餓的話，你係可以到機尾，空姐會俾啲餅乾花生之類既零食你。

秘訣七：加餐要點做？

一般情況下，航空公司都會安排比機上乘客多一至兩份既飛機餐，所以如果你太肚餓的話，都可以考慮向空姐攞多一份。如果坐最後一至兩排，空姐通常喺派完餐之後，都會先問佢地有無需要，如果無人要的話，佢照樣會將餐點扔掉；但係，如果你坐既係前排的話，你就需要主動同空姐講，等佢地派完餐之後再俾多一份你。

秘訣八：揀位都要技巧

派餐一定會先派俾頭等、商務客位既乘客先？唔一定既，如果係大機的話，商務艙、頭等艙同經濟艙都分別有空姐分頭負責派餐；有啲甚至會係將空姐分成兩組，一組負責飛機前半段既乘客，另一組就負責後半段，所以反而係坐經濟艙中間既乘客會攞先都唔出奇。

秘訣九：有特殊要求既飛機餐

患有糖尿病、心血管病人或者有宗教禁忌既乘客，都可以事先度身預訂一啲啱自己口味既菜式，但記住要喺航班起飛之前24小時提出申請。