點解啲上一代咁煩？- 舞台劇講起（Dylan）

有人講過，八九十後係被孤立的一代。呢句說話令我思考咗好耐，代溝係必然會存在嘅，但係點解呢一代會直情變咗孤立呢？又或者應該問，點解我哋呢一代會覺得被孤立呢？而其實所謂嘅孤立又存唔存在？

我先唔直接答你，我用例子答你。筆者曾經於中學時期喺某一青年中心成立咗個青年劇團，做過小型表演，亦有公開演出。我哋今次會試吓由舞台劇開始睇吓，上一代同我哋有幾隔離。

當年其中一套製作喺講關於LGBT，其中一幕我哋需要用到介刀。當然介刀係危險嘅，所以我哋將入面刀片攞走。而居然我哋中心嘅supervisor ban咗我哋用介刀，理由係：我聽到介刀咔咔聲會好不安！

咁當然你可以話，道具啫，換咗佢咪得囉。

出場刊嘅時候，我哋嘅設計係以男扮女裝及女扮男裝嘅相，油畫化，分別作封面底。每本場刊都會擺喺座位上，而我哋嘅supervisor見到，亦都係覺得有問題。佢要求我哋只可以將女扮男裝嗰一面作封面，理由係：我見到會覺得好不安！

咁當然你可以話，擺位啫，掉轉兩面使死咩。

有一次攞咗一批funding諗住做一個叫港島東保衛戰嘅show，喺導演同演員都仲係揣摩緊套戲嘅訊息嘅時候，主任：「你個劇本影射香港東北吧。都係果啲啦，唔知你寫乜，總知唔比做。」成個show無埋。

個主任嘅年紀，正正三十幾歲嘅中女。

本身嘅社會制度下，年青人要發展讀書以外嘅興趣已經係難過陳七射十二碼。家長無支持，政府無資源，制度無彈性。對我哋嚟講，逼得我哋落此窘境嘅就係我哋嘅上一代。我哋每一絲嘅機會，每一點嘅興趣，每一滴嘅創意，還未萌芽已被扼殺。呢樣不單止係家長，係成代嘅心態問題，甚至成為咗社會進步嘅枷鎖。

上一代係喺經濟奇跡下成長嘅一代，佢哋嘅精神確切係獅子山精神，但係呢種精神帶嚟嘅所謂「打不死/絕處逢生態度」，並冇想像中咁正面。「唔好怕蝕底」，「最憎政治」，「唔拉晒你哋坐監算好彩」，「唔好吓吓賴政府」，「搵食啫」，「最緊要買到樓」。喺我哋開火前，我哋有必要試吓做啲我哋好少做嘅事，認真思索吓佢哋嘅成長背景係點樣造就呢一班人，再諗吓呢件事存唔存在，又或者點樣誕生。如果你純粹想搵吓共鳴或者發洩，可以skip咗呢part(from # to #)。

#佢哋剛出生嘅年代就係殖民前中期，一開始英國政府都係以愛理不理嘅態度對待香港同香港人，社會嘅上層都係外國人，當時階級嘅區分基本上就係被殖民者vs殖民者。但係一過咗七八十年代，港英開始實行番一啲政策改善社會環境，而社會亦都儲夠一定嘅資本發展，再加最上層嘅殖民者開始離開香港，創造咗好多”room at the top"，霎時間香港遍地都係機會向上流，亦確切有一班人把握到呢個機會成為中產甚至資本家。即使唔係嗰班成功爬升嘅人，呢樣嘢亦成爲咗佢哋呢一代嘅象徵，佢哋甚至可以話係一個榜樣。努力會有回報，成為佢哋嘅標誌。

另一方面，當年大家都知道香港根本未有任何本土意識凝聚過，更談不上參與政治。而當時嘅政府都真係幾yaya烏，佢哋嘅經濟奇蹟係佢哋眼中係完全憑自己雙手創造嘅，所以某程度上佢哋唔會期待政府幫到佢哋好多，最多只係幫手比吓福利，分分鐘就好似當係中學班會咁。

再進一步講，所謂第一代嘅香港人只係一班由大陸走難落嚟嘅難民，最大嘅幾批包括國共內戰，共產黨成立同埋文革，三樣基本上都係為咗逃避共產黨。所以好多時你都會聽到啲老人家講「當年共產黨真係好恐怖」。基本上佢哋係當香港係一個避難所，好難有身份認同而言。而時間線上嘅第二代，亦即係第一代擁有香港人呢種身份嘅佢哋，對大陸嘅態度就係阿燦，無文化，但係某程度上亦喺潛意識入面保留咗恐共心理，藉住持續嘅嘲笑嚟掩蓋自己心入面嘅恐懼。試諗吓，假如你真係覺得佢哋咁低賤，你有冇咁好精力去天天月月年年指住佢哋嚟笑到永遠？

更加唔好忘記，「香港人」呢個身份甚至「本土」呢一個思潮係好近期先建立緊嘅事。正如啱啱講，初代香港人只係一班難民，佢哋只係咁啱在獅子山下相遇上，想用歡笑掩蓋唏噓。再到第二代，大家嘅老師/專家都會同大家講許冠文英傑時代開始幫大家建立何謂香港人。但係再諗深一層，身份嘅背後無堅實嘅文化或者核心價值去支撐只會流於虛無，所以香港人對佢哋嚟講只係單純一個國籍（區籍）。但係呢個身份當然唔會完全係空心啦，咁有乜嘢可以擺係呢個核心嘅內圍呢？就係講過嘅努力有回報啦，講到底，姐係錢，最易令人同價值腐化嘅事，漸漸佢哋嘅身份，「香港人」核心嘅外圍都被金錢覆蓋。

大家開始了解佢哋未？（了解非體諒）而不幸地佢哋呢班人基本上佔據90 %嘅社會上層空間，佢哋嘅價值觀就自然成爲社會主流價值，而完全對立於社會現實同我哋嘅價值，因為佢哋係出生於一個夢幻世代，佢哋嘅價值觀係只適用於佢哋嘅年代。例如所謂嘅多勞多得，係整個社會因從殖民時代轉型而創造出嚟嘅room at the top，縱觀整個香港歷史同未來走向（因為我唔熟世界歷史），基本上唔可能有第二次，因為係包含經濟結構轉型，再加上社會人口成份轉變，同埋本身香港特殊環境加晒上嚟所產生嘅機遇，名副其實一代功名，一生一次。

好啦開始長氣啦，講咗咁耐，係咁講話個環境點樣做就佢哋嘅出現，唔通佢哋自己本身冇責任咩？應該咁講，環境點樣變遷，佢哋的確掌握同改變唔到，佢哋喺嗰個時代背景之下亦都冇做錯，但係佢哋絕對可以憑自己嘅意志去改變自己。大家都知道，夢幻嘅時代已經過去，呢個社會嘅階層已經不復有流動可言，中國亦唔係咁容易，或者話唔會鑑粗嚟，政治再唔係距離咁遠。佢哋話我哋戀殖，其實根本係佢哋戀舊。佢哋都愛香港，但係佢哋都唔相信，或者唔願意相信，或者唔想相信，而家香港嘅真貌已經完全唔同晒。佢哋以前嘅生活其實好簡單，有位就上，有嘢就做，唔使理咩政治，直情連政策都冇需要知道點做出嚟，用就得啦。但係佢哋以以前嘅思想生活喺而家嘅香港，只會乜都唔夠膽試，只係循著制度而行，無疑係作繭自縛。

如果你係文中所講嘅上一代，請嘗試理解一吓呢個世界。如果你唔係，請試吓勸喻吓佢哋，或者你都可以試吓轉種視角同佢溝通，話唔定效果超群！

#上一代真係好煩呀。

當然你可以話，其實全部都係我哋嘅主觀感覺，其實個社會無我哋諗得咁差呢。當然我都不反對，我都不應同不能反對。好似幫我check文個friend咁講，呢個究竟係世代交替嘅常態，定世代嘅變態呢？

其實（覺得）比上一代繭所縛嘅人社會上比比皆是，呢個年代之隔已經成為咗成個社會各方面進步嘅阻窒。就好似文首提過嘅戲劇咁，當連藝術都被打壓嘅時侯，我哋究竟仲剩低啲乜呢。

當然，我哋呢一代係被孤立嘅一代，同時都係（最後）希望嘅一代，但係面對重重壓逼，有餘力反抗嘅只係寥寥數人，而且前路艱巨非常。好似頭先提過被滅聲嘅劇本，大家都知道藝術係香港發展嘅空間少之又少（連lobster都冇上就知有幾不濟），好似呢位編劇咁肯寫呢啲咁敏感嘅嘢香港有幾多個仲生存緊？而呢個劇本，喺被個中心滅聲之後，終於有機會重現人前啦。今次呢個港島東保衛戰，之後會喺沙田大會堂上演，製作團隊無任何水喉，要自己攞錢出嚟做晒所有嘢，佢哋嘅下場一係就蝕，一係就蝕到仆街，一係就蝕到仆街死。如果大家有興趣了解吓套戲甚至買吓飛，都可以睇吓下面條lin。（故事背景係「港島東被九龍人入侵」。而入面講咩信息就可能要大家自己睇吓啦）如果想知多啲關於套戲嘅事，都可以去高登post到討論下，筆者遲啲都將篇嘢po去高登，有興趣就幫手喺創意台推吓（應該沉咗）。https://www.facebook.com/%E5%A3%B9%E5%9C%98%E5%92%8C%E6%88%B2-%E6%B8%AF%E5%B3%B6%E6%9D%B1%E4%BF%9D%E8%A1%9B%E6%88%B0-1013086958734898/

最後，我衷心希望大家有時可以停落嚟思考吓成個社會，當然某程度上係而家呢個年代，思考未必係主流，甚至有人認為會拖累到行動（其實只要你諗得透徹應該唔會，可以睇吓我上一篇文），但係始終人唔思考，個腦就會廢咗。或者可以當係思考練習，話唔定會從中得到啲新體會。

利益申報：套戲嘅演員之一。雖然後面係宣傳，但係想寫呢樣嘢好耐，希望有機會寫埋下半部。

作者：Dylan（本文章由聚言時報授權提供）