【$10 大大杯雪糕】法包小店試業限定～贏晒全旺角！

旺角又有新開小店！ 充滿法式風情， 特別這個有少少遠離旺區的豉油街尾， 你忽然似置身外國一樣.

同事阿群問:「你有去過法國咩？ (我:無)，咁你點Feel到法國風呢？」， 我:「我有睇戲㗎麻， 紅白藍嗰啲...…我夠無去過韓國啦， 咁我唔可以覺得宋仲基靚仔咩？~NG」

老實說，這舖位短短數年，我已先後見証車仔麵、日系拉麵燒物、韓式小店，到開業只有兩星期的法國迷失麵包店，果然這個位置很大同呀！

同事又問:「你又會咁清楚？ (我:因為我就住附近囉！！)」

標榜Pain Perdu專門店， 當然主力賣烤麵包，細細的如同蒜蓉包大小，7款甜食，(價錢由$40-$58)，4款鹹食，(價錢由$50-$55)(老實， 真係幾貴)。

看來我最少要叫齊四鹹一甜，應該今晚才會半飽，(乜法國人咁細食咩？)。不過， 重點來了...…

5月法包店試業，全場8折，即時想試一試！！

如果撇除價錢，我們點的芝士三重奏 ($50/$65套餐)，白菌($48/$63套餐)，即叫即製，熱辣辣，夠香，夠味. 可惜這個份量，早餐也嫌太少呢！

聞說Pain Perdu意思是法國人不想浪費隔夜麵包，所以沾上蛋醬再烘煮。我最初以為似放涼了的蒜蓉包又乾又硬，原來軟中帶點點的韌，做小食一流...…

當正餐， 應該只有我這個傻佬吧.

如果要比較鹹食，甜食一定完勝。蜜瓜/哈蜜瓜 配牛奶雪糕，再加沾上焦糖的Pain Perdu ($50/$65套餐)，一凍一熱，軟身多士配生果+雪糕...…大滿足。

不過， 全場最最最有賣點，勁勁勁推介的一定是原價$28， 6月前大特價，只賣$10杯裝乳酪雪糕...…抵抵抵！！

專門店質素，麥當勞價錢，無話可說。

店員:「每日嘅生果味都唔同，今日係芒果。」 SY:「真係芒果味嚟架，而且佢中間仲有提子乾同早餐碎碎，真係好好食。」

無錯！ 我決定6月前會繼續過來， 法包就不用客氣， 買$10超抵雪糕...， 贏晒全旺角， 無得輸啦！！ 

$10大大杯水果乳酪雪糕 (優惠至5月30日)

Pain Perdu Salon De Thé
地址：旺角豉油街126-128號明威閣地下K舖

大仁生活