為見證神奇部隊李斯特城提早奪冠(同時睇熱刺仆街),專登唔訓捱到三點睇波。結果車路士無令我失望,縱使上半場先失兩球,最後亦追成平手,造就李斯特城登頂。

▲形勢分析(有睇開波嘅朋友可以飛左呢 part)

車路士今季表現強差人意,來季無緣歐洲賽幾乎已成定局 [1]
。相反熱刺今季狀態大勇,趕過阿仙奴、曼城等勁旅進佔第二位,成為直至昨日為止唯一可挑戰李斯特城的球隊。

論戰意,熱刺稍勝一籌。熱刺一分都不能少,今場自然希望擊敗車路士全取 3 分,保留後上奪冠機會。另一邊廂,同樣身處倫敦嘅車路士雖然無欲無求,但仍然派出強陣應戰,係為面子而戰,亦係為阻止同市死敵踩住自己嘅屍體前進。

▲賽事

作客的熱刺憑上半場 35 分鐘和 44 分鐘的入球取得領先優勢,車路士無力反撲只有捱打。滿以為熱刺又取得一場勝仗之際,他們卻在下半場判若兩隊,球員火爆有餘,威脅性有限,終於在 83 分鐘被夏薩特射入靚波,斷送兩球領先優勢,同時斷送今季爭標希望。

無疑,熱刺球員紀律係賽事焦點之一。熱刺由開波打少林足球到完場,如果唔係球證卡頓保偏幫加選擇性失明,熱刺最少應該拎三面紅牌。秋後算帳追加停賽少不免,亦都係咎由自取。而要為呢個結果負最大責任嘅人,當然係熱刺領隊普捷天奴。

▲領隊無法控制球員情緒

有人話,熱刺隊波多後生仔,EQ 低,所以先會出現咁多犯規。我諗佢地大概唔記得左,確保球員心理質素平衡係領隊責任。當球員失控,領隊係責無旁貸。上半場丹尼路斯同韋利安發生衝突,普捷天奴第一時間衝入場內分隔兩人,照計佢會比電視機前觀眾更加感受到賽事嘅火藥味有幾大。半場返入更衣室,作為領隊嘅佢,好應該叫球員冷靜作戰,下半場減少犯規。

可惜我地見到嘅,係下半場熱刺球員一次又一次飛剷唔收腳、小動作多多,黃牌一面接一面,更加出現拉美拿蓄意踩法比加斯隻手嘅核突場面。不禁令人懷疑,到底普捷天奴係默許球員粗野犯規,定係連佢自己都失去冷靜,忘記自己領隊嘅身份同責任。

有黃牌球員不敢去盡,無黃牌球員攔截粗野。踢人唔踢波,宣洩了情緒,卻對戰局無任何實質幫助。犯規次數多直接浪費比賽時間,球員心浮氣躁無法專心比賽,被追和之後再無力收復失地亦合乎情理。

▲戰術出錯後勁不繼,黃牌過多奸有奸輸

睇尋晚隊熱刺,不其然令人聯想起高普年代嘅多蒙特——同樣 4-2-3-1 陣式,防線壓前,前場不斷壓迫對手。

上半場的確睇到實效。熱刺球員壓前,令車路士球員陣腳大亂。中後場球員好多時只能夠大腳踢前或者回傳,無辦法有效組織攻勢,結果上半場熱刺憑哈利卡尼、孫興民連入兩球領先。

然而壓迫戰術需要消耗大量體力,呢一點我響以前嘅文章已有提及[2],作為領隊嘅普捷天奴亦無可能唔知。下半場熱刺球員明顯出現疲態,埋門威脅性亦較上半場少。由下半場開波,到被加利卡希爾追成 1:2,直至夏薩特扳平比數,期間熱刺都無明顯加強防守。有睇場波嘅朋友,應該都聽到下半場普捷天奴響場邊唔止一次大叫 “Push! Push!",希望貫徹壓迫戰術。奈何球員一來體力不繼,二來已有五名球員有黃牌在身(其中三人為後衛),攔截時多少有顧忌,埋下和波失分伏線。

以夏薩特追成 2:2 的入球為例,由響中場帶波、交畀隊友、走位到射門,先後共有三個熱刺球員埋身壓迫(拉美拿、獲加、戴亞),三人當中前兩者都有黃牌,攔截自然無上半場咁兇狠。另一方面,論體能,夏薩特下半場先至入替,體能較充裕,在受到較少壓迫之下終於發揮出水準,射入今季最關鍵一球。對比起踢足 80 幾分鐘、執行壓迫戰術到筋疲力盡嘅熱刺球員,可謂此消彼長,高下立見。

熱刺半場領先兩球,形勢大好,本應加強防守,在保存體力之餘也可伺機反擊,更加有效地控制比賽,根本唔駛同對面鬥攻。偏偏普捷天奴反其道而行,下半場堅持壓迫戰術,結果無法增添比數之餘被迫和失分,更出現球員集體失控嘅畫面。以上種種,領隊普捷天奴要負上很大責任。

▲輸掉冠軍,失去球迷支持,影響下季部署

隨著賽事完結,爭冠懸念落幕。本來可以獲得掌聲的熱刺,選擇以最醜陋的方式答謝球迷。今季不少稱讚熱刺「熱血」、「雖敗猶榮」的球迷,自昨日一仗後盡皆默然。這不是因為熱刺無法奪冠,而是球隊的行徑實在欠缺體育精神,大概連多年的熱刺球迷也看不過眼。大半季經營的形象,就在一場賽事中輸清光,可謂偷雞不成蝕把米。

球迷失望在所難免,隔季波監影響更大。基爾獲加蓄意踢腳、丹比利在爭執期間插眼、拉美拿踏中對手手背、丹尼路斯賽後推跌對方主帥等等,全都被攝影機鏡頭捕捉,作為秋後算帳的證據。按照慣例,犯下粗暴行為的球員一經定罪,會被罰停賽三場。基於本季賽事只餘下兩場,代表熱刺下季開季時,將要為今場比賽的粗野行為付出代價。單場 9 位球員食黃牌,既打破英超紀錄,亦勢令球隊面臨罰款,對備戰來季賽事有一定影響。這些都是熱刺領隊普捷天奴放任球員無紀律作賽的惡果。

作為阿仙奴 fan 屎,見到熱刺沉淪自然心涼之極。不過車路士球員永不放棄嘅態度,加上迪亞高哥斯達紀律比起加盟初期大有改善,亦令人不得不敬佩領隊希汀克嘅治軍手腕。下季改由干地領軍,兼且無歐戰後顧嘅車路士能否重振雄風,實在令人期待。

 

[1]  車路士和波後以 48 分排第 9 位。要取得下季歐霸盃資格,在餘下三場比賽必須 i) 全勝;ii) 合共淨勝 7 球以上;iii) 寄望修咸頓、利物浦在餘下聯賽賽事全敗;iv) 寄望曼聯在足總盃決賽擊敗水晶宮,使聯賽排第 7 球隊獲得歐霸盃資格。

[2]  

/

 

作者:Amethian(本文章由聚言時報授權提供)


 賽後分析:熱刺被迫和無緣爭冠,責任在普捷天奴(Amethian)

 https://www.facebook.com/GaldenPolymer/timeline