我係一個黎明粉絲！即使我唔係好識佢d歌（minidance）

黎明絕對係我小學嘅回憶，係佢嘅歌陪住我由細路女變少女……

愈夜愈有機、全日愛、眼睛想旅行、Sugar in the marmalade、聽身體唱歌……

一路以嚟樂壇愈嚟愈多新歌手，上咗中學之後都無乜再聽黎明嘅歌，直到出嚟做嘢之後……

對明星偶像已經無乜熱情，忙工作、忙家人，但係見親黎明開演唱會，總係覺得，好難得！

兒時嘅偶像，直到自己出身，都仲可以開到演唱會。

唔知係想尋找童年回憶，定係對黎明嘅一種情意結。

總覺得自己既然屬於嗰個年代，好應該去支持下！

而黎明，無令我地失望！四個字: 值回票價！

半戶外場地，播住輕音樂，有d似Wine & Dine嘅氣氛。

四個分區名都係用L E O N字頭命名（我地坐Night Horror！）

今晚誤打誤撞由第二場變為頭場（食環署事件）

相信對歌迷，或者係對Leon 都有特別大嘅意義……嗰種迎難而上嘅態度，更覺值得大眾支持！

成場氣氛拿捏得好好，由Leon對留聲機獨白而揭開嘅序幕，再由快歌幫觀眾熱身，成場嘅燈光做得好好，成個畫面好靚！

十字形舞台仿佛拉近咗我地同黎明嘅距離，仿佛嗰個空間只有我地N區嘅存在。

Leon會一次連唱3-4首歌就換一次衫，空場嘅時候，左右兩邊加正中間黑幕播嘅動態畫面個人覺得好好睇！無故事元素，但係帶動到人緊張嘅神經，音響做得到位，想像到如果係按原定計劃圍住黑布既話會幾驚……

係，今晚唱嘅好多首歌我都係第一次聽，唔識唱……見到身邊好多同我一樣已經係中女嘅fans，真係句句同Leon一齊唱，嗰刻諗，我算得係咩，大把真．粉絲在場。

我都係返返埋自己位，靜靜地欣賞黎明嘅歌，同埋嗰種唔會隨年紀增長而磨蹭嘅巨星魅力；欣賞一班真．粉絲唔受上班服嘅束縛，手舞足蹈，為自己愛嘅偶像如痴如醉，聽住熟悉嘅音樂自然而打住拍子。

其實我真係好鐘意黎明。

同其他明星唔同，你唔會expect喺佢口中聽到官腔說話，佢下一句講咩你永遠唔會估到（唔好話估到，聽完都未必真係明佢講咩……）

呢種真性情，喺樂壇、喺娛樂圈、喺你同我日常生活中，能夠搵到嗎？

今次選擇係中環海濱活動空間（摩天輪隔離）搞呢個show，絕對係一個大膽而成功嘅決定。

入場前一直望住摩天輪同醉人夜景，入場後半戶外帳幕，融合嘉年華氣氛，善用3D立體全螢幕投射大畫面，加埋出色嘅燈光配合…..成件事，我相信就算唔係黎明fans，置身其中一樣會好投入！

好耐無試過為一件事咁投入喇，仿佛因為黎明，我搵返少少屬於自己嘅青春。

黎明，加油！

p.s. 人可以老 心境唔可以老！

p.p.s. 陳慧琳今晚都喺N區！

作者：minidance（本文章由聚言時報授權提供）