因為VIU，我拍拖洗少左好多（毛言地）

大家好，我叫H君。
　　
我係個文員仔（唔係被挑選果位），好好彩咁搵到個女朋友，生活都算幾開心，不過係洗費比較頭痕。雖然我地都唔大洗，但兩個人出街食飯睇戲總小不免用返三五百蚊，再加埋買下衫褲鞋咁樣，兩個人份糧每個月有返一千幾百淨都已經算係咁。
　　
我係自己一個住，以前我成日幻想同自己女朋友一齊喺屋企食住熱浪睇電視係幾咁平凡浪漫嘅一件事，但當真係拍緊拖，我又覺得叫女朋友上嚟睇電視唔係咁好意思－－你知啦，大台有邊個節目睇得人先？由愛回家到晚間新聞依段「黃金時段」真係打開電視都廢事。地球之友一年先搞一次熄燈一小時，而我部電視一日差唔多熄足廿三小時，論環保我真係企喺社會最項嘅位置。因為冇得一齊睇電視，喺屋企可以做嘅事又唔多，所以出街拍拖就係我地嘅習慣，亦係我地荷包一直慢性出血嘅原因。
　　
但自從VIU開左台之後，我部電視開得密左，碳排放變多左，出街嘅時間自然少左。我終於可以叫女朋友放工嚟我屋企睇電視，陪佢睇完韓國靚仔男神之後大家一齊煮下飯仔，食飯果陣再睇埋一班女人打生打死或者話題性夠高嘅旅遊節目，喺屋企舒舒服服咁過一個寫意嘅夜晚，唔洗再夏天行到身水身汗，或者為左等部戲開場而喺星巴克飲咖啡㩒電話等夠鐘。我終於可以喺梳化攬住女朋友睇電視，一齊笑一齊肉緊，唔洗花一分一毫（如果唔計電費的話）就可以享受兩個人最親蜜嘅時光，完成我拍拖最想做嘅事。
　　
自從VIU TV開左台，我地買嘢喺屋企煮嘅次數有增無減。比起喺街食貴到死嘅味精餸，女朋友嘅愛心飯簡直係人間極品，再加埋我最拿手嘅甜品，每一餐都可以用完美去形容。而家每日我最期待嘅就係放工約埋女朋友買料煮飯然後一齊睇電視。食少左味精唔單止健康左，用喺食方面嘅支出少左，冇再因為成日行街而買無謂嘢，我地儲嘅錢仲夠兩個月後去返轉韓國添。VIU唔單止令我部電視有返佢嘅基本價值，仲令我同女朋友嘅關係更進一步，而加我地唔洗再為食咩而煩惱，連交都嗌少左好多，今鋪真係要多謝大大聲咁講一句：多謝 VIU TV ！

作者：毛言地（本文章由聚言時報授權提供）