【連Pizza都有得食】韓版Starbucks 必食多士、抺茶撻！

雖然一套韓劇都未煲過，但韓食我一樣好。

韓版Starbucks一定要第一時間試，因為那個「漢拿山多士」實在太太太吸引。

我問店員:「你哋有幾多款多士呀？ 我想食最好味嘅。」店員Alex答:「我哋有4鹹2甜吐司，甜就一定係蜂蜜奶油($55)，鹹就蜂蜜芝士吐司」(各一！唔該！)

即叫即烘厚吐司，加上變出「忌廉漢拿山」前後，都會分別落肉桂粉、蜂蜜及焦糖糖漿，絶對雙重享受，抵到爛！！

「忌廉漢拿山」誕生的一刻又怎可以不連拍呢？

其實，SY本來想要朱古力，但Alex說:「朱古力味道太搶， 你依款我覺得味道最夾， 又唔會寡，信我」，我一定信你，你咁靚仔，十足袁偉豪一樣。

熱辣辣多士， 令到忌廉很快溶， 所以大家記得要快快影相呃Like呀！

這款忌廉好好食，不太甜，又不膩，我本來以為是韓國出品，原來她來自日本。

之後就是將多士一開二，中間夾入迷人黃芝士，再放入焗爐加熱。

雖然這個外貌平平無奇的蜂蜜芝士吐司，但上枱SY即時大叫:「蒜蓉包？ 爸爸係咪蒜蓉包？ 好香呀。」

Alex:「原來你鍾意食蒜蓉，如果你叫蒜泥奶油吐司，仲多蒜蓉」其實，現在已經好正！！

SY:「依個蒜蓉仲好食過頭先個大雪山，因為頭先個包皮好硬，依個軟腍腍， 我鍾意」，可能厚麵包要開半夾芝士， 以多士烘出來的邊緣位置變軟吧。

鹹鹹地的多士，配輕甜蜜糖，之後再飲一啖Tiffany blue檸檬汽水（$35），簡直有發達感覺。

本來對這杯湖水藍汽水有點抗拒的SY， 飲了一口之後:「真係汽水嚟架，個口好爆炸，酸酸地，好飲！ (你頭先好似好唔想飲？)，我唔知吖麻，總之就好飲，唔好講咁多。」

全店最意想不到就是這個襟章大細的抺茶撻($33)。

上層軟軟抹茶慕斯，下層如曲奇口感的鬆餅，一放入口...…竟然口腔爆出澎湃抹茶回甘味。滿足感同抹茶味一樣，爆棚！！

臨走前才發現店員在焗Pizza...…(乜你哋有Pizza食架？)

Alex:「有呀！仲有4款...…」咁我下次一定要嚟試先得！

點解Starbucks無咁多好嘢食嘅呢？ 

Tom n Toms Coffee

地址：沙田新城市1樓158號鋪

時間: 07:30am – 11pm