我唔貴但好好味－雲吞麵的自白（毛言地）

你可以叫我雲吞麵，或者細蓉。我從來唔係咩高級食品，平嘅是但落街食一碗廿蚊左右就可以係一餐，就算你要食好西，食老字號都好，我嘅價格都一定低過一塊安格斯牛扒。雖然我係平價嘢，但為我傾心嘅人都唔少。

對好多人嚟講平嘢唔一定冇好嘢，可以餐餐食牛扒生蠔食到肚滿腸肥有幾多個？每個地方最有特色，最多人慕名一試嘅都係價格親民嘅食物。香港除左我仲有煎釀三寶、台灣係炸雞扒同牛肉麵、日本就係天婦羅仲有拉麵、美國仲正嘅都係周街有得賣嘅熱狗。以上冇一種食物係身嬌肉貴，我地全部都係親民唔離地，理得你係奧巴馬定毛言地，你都有能力享用我地嘅美味。美味係最應該無分國界貧富，就算係毛言地依個窮鬼都好，佢都有資格食好嘢，包括我依一碗雲吞麵。

論成本我一定唔夠和牛黑魚子醬依類頂級食材鬥，但咁唔代表雲吞麵就係劣食，一定唔夠魚子醬玩。正如你一提起蝦子柚皮，好多老一輩都會流哂口水咁同你講佢有幾咁好食，仲有豬油撈飯一樣受一班食家青睞，話佢嘅美味只應天上有。一件事，一件食物嘅價值唔係一味靠價錢決定，黑魚子醬喺你心目中係第一，但話唔埋有一班人覺得我好食過佢多多聲。到底有咩人有資格決定邊一種食物係咪最佳？我諗唔到。就算食神覺得叉飯加隻蛋係佢食過最好食嘅嘢都好，佢都唔會話只有叉飯先可以係美食，因為佢知道依個只係個人意見。

知唔知依張寫真邊個幫我影？係一個日本人嚟香港專登搵我嚟食果陣影低的。對你嚟講可能我係一碗平平無奇嘅鹼水麵，但對個日本人，甚至好多人嚟講，我係一碗記錄住香港歷史，值得比日本香港來回機票去食嘅最佳食物。

肥嘢你悔辱我唔緊要，但你唔好悔辱支持我嘅咁多人。你冇品味自己知就算，唔好衝出嚟公告天下，好冇？

作者：毛言地（本文章由聚言時報授權提供）