去厠所係我哋日常生活中必做既事之一，所以去旅行要揾厠所都唔係啲咩特別事。但係，偏偏世界各地就有啲地方既厠所別樹一格，有啲為配合環境，有啲以設計取勝，總之就係要成為世界出名既景點之一。專門出版旅遊指南既《Lonely Planet》就出版咗一本專講世界各地厠所既書，而家就為大家揀出其中8個特別既「厠所景點」。
1.印度
位於印度拉達克（Ladakh）既修道院Thiksey Monastery入面既厠所，呢個地方堪稱係最荒蕪、最崎嶇既地方之一，換句話講即係夠哂靜，最啱俾人係度沉思。修道院既厠所唔知係咪都配合咗呢個主題，等啲人可以一邊小解，一邊望住環境思考人生。
2.貝里斯
厠所本來應該係愈「就腳」愈好，咁呢個位於中美洲既厠所，恐怕就唔合格喇！事關呢個厠所島（Toilet island）座落喺中美洲國家貝里斯（ Belize ）附近，去厠所吓吓都要搭直升機來回，唔知島上個厠所會唔會因為交通唔方便而特別乾淨呢？
3.巴西
去海灘玩當然都要有厠所，但係一片沙海面前，如果個厠所整到好現代化咁，又好似有啲格格不入。巴西Jericoacoara海灘既厠所，就咁用啲茅草搭成，俾你享受熱帶既原始風情。
4.坦桑尼亞
東非國家坦桑尼亞，當然係俾人探索大草原既地方，所以去既時候都唔好期望會有個好靚既厠所。喺Barafu Camp既呢個厠所，靠哂「開放」，無門之餘，相信係俾遊人挑戰膽量，話哂喺懸崖邊喎，你估真係個個都夠膽去架？
5.美國
喺阿拉斯加，有個好出名既溫泉度假勝地Chena Hot Springs Resort，週邊有條小溪、樹木咁，同現代城市隔絕，所以呢度既厠所亦都配合返森林既風格，整咗個小木屋廁所。
6.突尼西亞
北部鄰近地中海，位於北非既突尼西亞，其中有部分國土被撒哈拉沙漠所覆蓋，而當地既大鹽湖Chott el Djerid，就有個充滿當地民俗色彩既廁所，講緊既就係厠所門上既圖案。
7. 冰島
（圖片來源：http://i2.cdn.turner.com/cnnnext/dam/assets/160412161812-krafla-super-169.jpg）
喺冰島Krafla火山既呢個厠所，可以話係最無遮無掩既一個，相信真係要係度去厠所既人要非完全唔怕羞先得！一個馬桶、一個花灑器，俾人去厠所兼沖涼，但遠睇其實似裝置藝術多啲喎！
8. 台灣
（圖片來源：http://i2.cdn.turner.com/cnnnext/dam/assets/160412153818-india-super-169.jpg）
講到國家公園，你可能會諗到嗰度既厠所好簡陋，但係台灣花蓮縣既太魯閣國家公園，厠所就配合咗國家公園既大自然環境，簡單用木搭咗個厠所，充滿禪意同環保既感覺，仲要用綠草做背景，成件事靚到好唔真實呀！
