【小孩偏食食譜】茶碗蒸烏冬

自從包包出大牙絕食後，加上佢自己食飯，可以自己挑出唔喜歡既食物，於是更加偏食。

但我無夾硬要佢食菜或蛋，只會諗煮出更好味既菜同蛋引佢食。

當然理想同現實不符，幾靚既一碟飯菜，佢都會挑出唔喜歡食既。

不過我又樂此不疲時時刻刻去諗煮乜比佢～

昨晚整茶碗蒸烏冬，即係日式蒸蛋加烏冬，上面加一片鬆馳熊仔既魚片，佢見到後好開心但唔食，佢不忍食隻熊仔，哈～～

呢個晚餐佢都食得幾多，好多小朋友愛食蛋，佢偏唔喜歡。

煮呢個佢就不知不覺食了，所以話：呀媽係最不擇手段的，哼！

做法：

１先買包柴魚片熬個湯。

２大約用10g既魚片加200ml水去煮至出味，再加少許鹽調味。

３我配雞肉(先蒸熟)，大家可以配小朋友喜歡既肉或魚都得。

４烏冬我用冰既烏冬，所以要每灼一灼再瀝乾水。

５雞肉放最底，加上烏冬及新鮮冬菇、菜粒等等。

６最後用200ml柴魚湯，加2隻蛋打勻，倒入有烏冬既碗中，剩下蛋汁可以做多碗for大人食。

７然後蓋上錫紙，蒸15分鐘熄火後靜置2分鐘便完成。