同自己嘅另一半成婚，係人生所要面對嘅另一個階段，意味住自己除左多一個家庭需要自己管理之外，更加表示你從今以後要為兩個人同時著想，由兩個人變為一個個體。但係喺一齊相處嘅時候，有唔少人都會因為同住之後開始見到自己另一半嘅壞習慣，以及慢慢累積而變得難以忍受，更嚴重嘅更加會有機會因為無關痛癢嘅小問題，而令兩個人發生衝突，最終分手收場。
咁樣究竟喺咁多嘅壞習慣中，邊一啲係較容易令二人嘅婚姻出現危機嘅呢？以為就只有偷食先會令婚姻破碎？咁你嘅諗法實在係太過簡單喇...…
1. 喺另一半背後講佢壞話
當自己嘅另一半唔喺自己嘅身邊，就會忍唔住講佢壞話，咁樣其實係一個非常強烈嘅警號，亦都同你身邊所交嘅朋友有關。如果你已經習慣左同一班特定嘅朋友發牢騷，同佢地齊齊力數自己另一半嘅問題，咁其實證明左你同你嘅朋友都一樣，並無尊重過自己嘅另一半同埋你嗰一段嘅關係，剩係識得講而唔識得解決兩個人之間嘅矛盾，令你越來越習慣宣洩不滿，批評對方。
2. 集中火力批評另一半嘅弱點
明明對方根本就唔識做你指派嘅某樣工作，你仲要對佢非常嚴苛，咁其實只會令另一半覺得非常難受，因為無一個人係能夠完美乎合晒你所想嘅要求，正如你自己都會有自己嘅弱點一樣。所以如果你習慣左對另一半吹毛求疵，咁就真係要祝你好運。
3. 鬧交唔識停
其實都明白一開始左同另一半鬧交，好容易就會因為覺得自己係啱嗰一個而唔會認輸，一直想對方認同番自己，想佢覺得佢先係錯嗰一個。亦因為好勝嘅心理，好多人都會因為火遮眼而唔識得收口，鬧到唔識停。其實講真係咁鬧法，講出黎嘅都唔會係啲有建設性嘅建議，多都都係為左鬧而繼續鬧落去，無補於事。
4. 從來唔為對方設想
遇到唔認同對方嘅情況，你唔會為退後一步從對方嘅角度睇番件事，仲要係堅持己見覺得自己無錯嘅話，咁其實係好大件事，會令對方覺得你從來無嘗試過理解佢地嘅原因。如果雙方經常都唔識得退後一步，嘗試明白對方感受，一段婚姻就有機會會觸礁，無辦法令兩個人一齊走完下半生。
5. 情緒大起大跌
同自己嘅另一半之前仲有講有笑，突然就性情大變嬲到拍晒檯？假如你情緒成日都咁大起大跌，其實好容易就會令另一半變得非常難以適從，更加會認為你無事生事、無理取鬧，開始唔會理會你所表達嘅不滿。
6. 扮冷靜但其實最唔冷靜
另一半做左令你覺得唔滿意嘅事，而你卻黑起塊面扮無野，唔好呃人啦其實係人都睇得出你好嬲，因為你嘅身體語言已經出賣晒你，真係「口裡說不，身體卻很誠實」架。如果你同另一半相處嘅時候會成日出現咁嘅情況，咁就代表你地都無盡力了解對方，亦都無試過說服另一半明白你嘅感受。長久下去無論對您定係您嘅另一半都唔係太公平，更會增加你地兩個人相處時嘅壓力。
7. 完全唔鬧交
如果你同另一半已經去到有衝突都抑制住唔鬧交嘅局面，咁就有機會代表你地都唔想再抖纏落去，已經受夠左對方無理嘅要求，選擇左放棄呢個最終選項。
8. 等太耐先處理問題
好多人有時就算經常受另一半氣，都會選擇啞忍而唔去儘早解決問題，其實咁樣做只會令問題越積越深，容易令情況去到無法挽回嘅一刻。因此相反起迴避問題，更應該做嘅係要同另一半一齊面對出現左嘅問題，一齊成功解決反而會令大家了解更深，強化二人關係。
