日本因為近近地，一向都係唔少人假期必去嘅一個旅遊熱點，除左女士最愛嘅 美妝、護膚產品之外，當地嘅美食都係令大家沉醉日本嘅其中一個原因。但係如果想將日本嘅美食帶留黎香港又會有咩嘅選擇呢？咁你就一定要mark定下面嘅10款必買神級手信，下次去日本記得要選購呀！
UHA味覺糖
UHA味覺糖雖然喺香港都經常見到，但係最近佢推出嘅其中一款卻係喺香港並唔常見，質感係模仿左真正嘅提子一樣擁有外皮，新奇又好食！所以如果經過日本嘅便利店或者藥妝店，都可以不妨留意下呀！
東京香蕉蛋糕
對於東京香蕉蛋糕嘅大名，應該好多人都曾經聽過或者試過，但由於佢真係好好食，蛋糕軟綿綿餡料又有著香濃嘅香蕉味，所以真係要再三提醒一定要買。而且東京香蕉蛋糕表面嘅花紋更加係非常美觀，買黎送禮真係唔錯架！
牧家布甸
牧家布甸最與眾不同之處，就係佢所呈嘅竟然係球型，非常特別。另外喺食呢個布甸嘅時候，更加得意嘅係原來要用牙籤刺開包裝先食得。更令人難以遺忘嘅係牧家布甸嘅味道係非常濃郁，更有唔少口味選擇。喜歡甜食嘅應該會好想一次過帶晒佢地番屋企。
HORI哈密瓜啫喱
HORI哈密瓜啫喱喺北海道嘅甜點選舉中，係眾人投選嘅冠軍，深受女性歡迎。哈密瓜雖然喺日本黎講都係一種必吃嘅水果，但講真一個哈密瓜咁重要拎番黎，真係無咩可能。所以如果想帶好食嘅日本哈密瓜番香港，不妨就可以考慮下HORI哈密瓜啫喱。
札幌農學校牛奶餅
講到牛奶餅，大家可能首先會諗到白色戀人，但其實札幌農學校牛奶餅都係當地一款非常受歡迎嘅牛奶餅，更曾經連續三年獲得Monde Selection金賞榮譽。最方便嘅係唔記得買手信嘅話都可以喺羽田機場搵到佢！
札幌烤粟米
札幌大通公園嘅烤粟米一直都係非常出名嘅美食，而呢一款嘅札幌烤粟米小食山就係最能夠捕捉到佢嘅神髓，非常香口，令人一食上癮。
京都宇治抹茶牛奶夾心大福
宇治抹茶本身就係日本最受歡迎嘅一種甜食口味，而如果您想買一樣又睇得又好食嘅手信送比女性朋友，你就一定要買京都宇治抹茶牛奶夾心大福！由北海道牛奶製作嘅兔仔外皮，加上大福入面嘅抹茶忌廉，味道賣相都簡直係一流！！
六花亭士多啤梨朱古力
數到北海道出名嘅甜點店，一定要數到六花亭！而當中嘅士多啤梨朱古力更加係旅遊當地必買嘅一樣手信。包裹係朱古力中心嘅急速冷凍乾燥士多啤梨，食落去清爽香甜，鐘意士多啤梨朱古力嘅朋友就一定要試。
北新地呼吸朱古力
因為同佢個名一樣好似會識得呼吸一樣咁新鮮，所以去親大阪嘅外國人都一定會買佢。北新地呼吸朱古力一共有5個口味，包括原味、抹茶、黃豆咖啡，以及期間限定的士多啤梨口味，喜歡朱古力嘅一定唔可以錯過。
Royce朱古力
Royce朱古力唔係香港都有喇咩？係就係！但係喺日本買嘅其實係平過香港好多。而且由於Royce朱古力標榜於北海道生產，味道濃郁又唔會太甜，真係令人一食上癮架！更令人難以置信嘅係除左朱古力之外，Royce更有一隻朱古力薯片，所以一定要買呀！
