香港李嘉誠喺變成億萬富翁之前，第一份所打嘅工，傳聞就係喺舅父嘅手錶公司裡面修理手錶，聽落非常平凡，同唔少人都無咩分別。香港富翁發跡前嘅故事，相信大家都應該聽唔少，但對於外國嘅名人富豪成名前打嘅第一份工，你地又知幾多？

▼特朗普：按樽仔▼

有意競逐成為美國總統候選人嘅特朗普喺成名之前，原來所擔當嘅第一樣工作就係幫自己嘅爸爸回收汽水樽，同哥哥一齊去地盤執樽仔去按黎換錢。雖然呢份嘅工作並無令特朗普賺到太多嘅錢，但喺接受訪問嘅時候特朗普卻表示呢個嘅經驗卻令佢學識左要有錢就要自己做野嘅道理。

▼希拉里：機動遊戲樂園操作員▼

喺自己嘅自傳當中，希拉里提過佢第一份有糧出嘅工作，就係喺芝加哥嘅機動遊戲樂園中擔當操作員，負責執波等嘅勞動工作，夏季一星期三日如是。希拉里更喺書中透露自己嘅父母係非常相信每個人都應該要自力更生、刻苦耐勞，因此佢地都會確保屋企入面每一個兄弟姊妹都明白一分耕耘，一分收獲，以及要尊重自己工作嘅道理。

▼桑德斯：木匠及紀錄片製片人▼

另一位有意競逐成為美國總統候選人桑德斯喺1964年於芝加哥大學獲得政治學學士學位之後，除左積極投身當地社運之外，更曾經做過唔少嘅特別工作，包括木匠及紀錄片製片人。最終喺1981年，39歲嘅桑德斯就喺佛蒙特伯靈頓中，獲選為市長。

▼布蘭遜：業餘雀鳥繁殖員及樹藝師▼

喺自己嘅LinkedIn當中，布蘭遜表示佢喺11歲嘅時候，曾經擔當過業餘雀鳥繁殖員，同自己嘅好朋友鮑威爾一齊繁殖鸚鵡，賣比自己嘅同學。而當發現鸚鵡繁殖速度比預期快嘅時候，布蘭遜同鮑威爾更開始轉戰第二個市場，出售繁殖出黎嘅鸚鵡。及後臨近聖誕節，布蘭遜同鮑威爾就曾經試過買入細細株嘅松樹準備喺節日中出售，可惜松樹最終都比兔仔咬爛晒，令計劃泡湯。

▼梅爾：雜貨店收銀員▼

梅爾喺成為Google公司第一名女性工程師之前，透露自己曾經喺16歲嘅時候所擔當嘅第一份工作，就係喺威斯康星州做雜貨店收銀員。梅爾回憶喺擔當呢份工作嘅時候，學識左職業道德價值，以及了解到每一個人每天所面對嘅家庭經濟學。

▼巴菲特：派報紙▼

巴菲特曾經講過自己喺小朋友嘅時候，就已經對於儲蓄、賺錢都非常有興趣，而根據佢嘅傳記，巴菲特喺13歲嘅時候就曾經做過報紙仔，喺天光嘅時候分發華盛頓郵報。然後喺同一年，巴菲特就將自己其中賺番黎嘅$1,200美元，投資到40英畝嘅農田裡面，真係年紀輕輕就已經好有生意頭腦。

▼奧巴馬：賣雪糕▼

奧巴馬貴為現任美國總統，但原來喺檀香山長大嘅時候，佢第一份嘅工作就係喺當地一家雪糕店做暑期工賣雪糕。

▼奧花·雲費：雜貨店職員▼

奧花·雲費係世界上最具影響力嘅女性之一，而喺成名之前嘅奧花·雲費，所經歷的童年其實都非常艱苦。喺青少年嘅時期裡面，奧花·雲費就曾經喺爸爸理髮店隔離嘅雜貨舖度做第一份工作。

▼彭博：停車場服務員▼

前紐約市長彭博雖然出身自中產家庭，但喺就讀約翰·霍普金斯大學之前，曾經做過停車場服務員幫補學費。

▼奧爾布賴特：女性內衣售貨員▼

懂得五國語言嘅美國國務卿奧爾布賴特原來所擔任嘅第一份工作，就係喺丹佛市嘅一家百貨公司內售賣女性內衣。奧爾布賴特更曾經向福布斯透露自己從工作當中學識左點樣喺惡劣嘅情況下應付客人。