【溫暖在西環】料理小店滿瀉愛咁好食 @ 通宵營業

上星期三超高興， 仁生第4次走到西環. 當晚因為「萬家超市」而過去. 一間充滿愛， 充滿人情味的小店. 由恩愛的波哥波嫂二人合力經營。

波嫂Wendy：「我哋用鹿兒島雞蛋， 真係好鮮又重蛋味」。超班食料，但價錢街坊。

飯竟然用上「越光米」， 這款新潟縣的米超濃米香，黏性吸引，一打開飯煲已經有強烈流口水感覺。

「臘味炒飯」， 及「芝士腸火腿鹿兒島蛋飯」， 都是Wendy愛食的東西， 波哥為太太特別加入Menu。

(愛妻之選喎！！好冧呀！！) 波哥：「佢鍾意食， 而D客食完又鍾意先最重要」(唔駛兜啦！！ 總之滿瀉愛啦)

一定要試波哥的招牌鰻魚飯 ($88)， 因為日賣80碗。今日20:30已經售罄， 我們是尾二的一碗 ~好彩剛剛行快兩步。

超長鰻魚， 足足有一部半Note5長度， 勁抵食。這裡的鰻魚算肥美，入口即溶， 嫩香鮮甜沒有刺。

波哥：「話晒日本鰻， 我哋唔會用台灣貨， 一食就知分別㗎」

(你落D咩係飯面呀？) 波哥：「鰹魚碎， 日本好普遍， D飯會更香」

萬家前身是超市， 因為去年業主加租3倍， 所以兩夫婦決定搬到現址， 波哥:「我不嬲好鍾意煮嘢， 舊舖太細， 只可以同客人口頭分享， E家大咗， 索性分一半出嚟做食肆」

(點解你哋開到咁夜？) 波哥一邊炒飯一邊答:「因為好多熟客出面做食肆， 佢哋返到西環， 太夜無嘢食， 大家張就下囉」

波哥續說：「有時D學生傾吓計， 飲吓酒， 又叫埋我， 試過有客人慶祝生日食到4點，  大家開心， 無所謂啦...哈哈哈！！」

店內有唯一一款非日本料理， 亦是波哥根據媽媽的味道泡製的清遠走地雞($50)。

(明明你賣日本料理， 點解特別有款清遠走地雞？) 好客的波哥:「因為一向我哋賣凍肉， 原隻清遠雞最受街坊歡迎呀！」

波哥續說：「 既然咁多人買， 我哋諗， 不如學我媽媽造法， 攞嚟做鹹雞飯，點知街坊又鍾意食， 香港人好鍾意食雞飯㗎」

波哥的雞飯預先調味， 所以肉嫩又夠味， 不過貪心的我， 將整碗雞汁倒了入飯， 感覺鹹味太重，如果放一半，或者直接點雞食，一流一享受。

(你點識煮日本嘢呢？) 波哥：「19歲我去咗日本民宿住咗3年， 幫D姨姨手煮飯，嗰時佢哋教我嘅，不過，我都係邊學邊煮，有時係D客教返我添」

這裡有小食「美國黑毛牛芯肉 ($48)」，肉汁多，又香...

波哥：「美國牛實肉D， 無咁肥， 味道出D囉」(真係好食， 不過得4舊，唔夠喉)

從前萬家賣凍肉， 不過7年前一次意外， 波哥切肉切斷了無名指， 用了一年時間去治療。

波嫂從此不准波哥切肉， 於是便開始兼賣日本食品， 這就是萬家超市皺形。

Wendy：「最初我哋乜都唔識， 要偷偷去SOGO抄代理聯絡， 日本人唔熟又唔理你， 結果頭一段時間， 只係賣烏冬」

現在， 幾乎大部份日本食品也可以買得到，價錢非常街坊。而且還可幾試飲，試食。今日有小朋友就得到波嫂送他兩粒士多啤梨雪糕。

(咁試法...會唔會蝕本？) Wendy:「大家試吓先知好唔好麻， 唔好食點買， 試食食得幾多吖」對最愛貪小便宜的仁來說，實在窩心。

山長水遠走來，一定要為「梅酒控」阿太帶手信回家，我：「你哋都有梅酒賣喎...阿太飲開Choya，有舊梅係裡頭，點解你哋賣嗰D無嘅？」

Wendy：「咋貨先有梅㗎，靚嘢係唔會有梅嘅，如果你老婆酒量好，買威士忌啦，保証唔係雜梅造，保身好好㗎！」

阿太如獲至寶，而我同樣被波哥的老火湯迷倒，波哥：「我請你飲吖，不過，我哋連鹽都唔落，可能你唔鍾意，我自己都晚晚飲㗎」我的味精舌頭全無投訴，就知波哥靚湯~超正啦！！