新聞就有聽過話係「無奇不有」，但工作你又有冇諗過可以係奇怪到咁地步？原來喺外國唔少地方，所提供嘅工種可以奇到你完全估唔到，例如睇電視都可以係一份工黎？狗仔滑水都有專人教練？不如睇下以下嘅10種你有冇資格勝任？！
狗仔滑水專業教練
人學滑水要由專業教練指導就聽得多，又邊有人諗到連狗仔學滑水，都會要有專業教練從旁悉心教導，仲要你比貴過教人嘅價錢丫！？有專門教練其實都唔算浮誇，再誇張啲原來有海灘係只會比狗仔學滑水用，人係唔可以去個啲地方學架！
專業伴娘
結婚係人生大事，唔少人都會同朋友同至親分享自己嘅呢份喜悅，邀請身邊嘅朋友幫手籌備婚禮，擔當自己婚禮當日嘅伴娘／伴郎。唔想麻煩到自己嘅朋友又或者覺得數目唔夠，影相／大日子當日唔係咁好睇？外國原來就有公司提供專業伴娘租借服務，價錢由2,327到15,512港元一場婚禮不等，能夠為婚禮中嘅主角提供專業意見／支援。
冰山移動員
「請把冰山劈開！！」唔好唱住，因為呢份工唔係劈開個冰山，而係移動個冰山。由於受到全球暖化影響，冰山因異常高溫融化崩塌移位，流出大海影響船隻航行安全。為了防止類似鐵達尼嘅意外發生，美國海岸防衛隊一直就有以國際冰山巡邏隊的身分處理冰山崩塌嘅問題，適時將移位冰山拖離受影響航道。
睇電視專員
唔講真係唔知睇電視都可以係一份工作，仲要唔係講笑真係要用心睇下電視上嘅節目係講緊乜，之後要幫手分類比電視台製作節目黎用。根據外國嘅一個電視節目聘請幕後睇電視專員嘅招聘廣告，睇電視專員一星期就可以賺取3,877至4,653左右嘅薪金。
面部觸感評估師
喺美容行業裡面，產品嘅效用係顧客最為關心嘅一樣資訊，如果唔係用左等於無用買黎都唔知做咩，晒曬啲錢。但究竟一間生產美容產品嘅公司，係點樣先會知道產品有冇效用？咁就一定要聘請面部觸感評估師先得喇！受過專業訓練嘅面部觸感評估師憑住佢地嘅一對玉手，就能夠感受到測試者面部皮膚上嘅變化，評估出產品嘅效用等。根據網站嘅招聘廣告，面部觸感評估師兼職職位每小時就能夠賺194蚊！
雞仔性別辨別專家
喺英國同埋日本地區，雞仔性別辨別專家一直都係非常常見嘅一種工作，主要係由商業孵化場所聘請的。雖然一個雞仔性別辨別專家嘅年薪可以高達465,349港元，即大約每個月賺38,779左右，但由於職位太過專門，工作要求嘅技能又太過難掌握，因此長期都係需求大過供應，成日都係請唔到人。
口氣分析員
香口膠、牙膏、漱口水等等嘅口氣清新劑，有冇效用就要交比相關嘅口氣分析員評估使用者喺測試後嘅效果，之後先至可以推出市面。所以我地日常用嘅產品有冇實際效果，就真係要睇下口氣分析員點樣評分先至知道真實情況喇！
狗糧食評家
以前成日都聽人講話狗糧／貓糧其實人都食得，而原來喺呢個業界入面，狗糧推出市面之前又真係會請人率先試食左先，睇下狗糧符唔符合要求嘅品質。除此以外，打呢份工嘅人仲要以科學嘅角度去評估狗仔糧食所含嘅營養，確保為狗狗提供充足嘅營養。
骨灰藝術家
至親死後所遺下嘅骨灰，原來有人識得用專業嘅角度處理，製作出用骨灰製作而成嘅藝術品。除左我地香港常見嘅紀念頸鍊之外，玻璃雕塑都係其中一種可以選擇嘅紀念品。
排隊黨
為左自己嘅心頭好而要花幾日去排隊？唔使自己去排喎！因為你可以請排隊黨幫你，收費起碼無炒價咁貴。喺外國做嘅排隊黨仲同記者講，高峰時期1個星期就可以賺到7,756港幣咁多，仲抵過番工呀！
