麥當勞叔叔之家開放日 (1)

6 DECEMBER 2014(SUN)

今日係麥當勞叔叔之家開放日，見依個係有意義嘅活動，所以都帶小小豬去參觀，玩下攤位遊戲啦~

其實今日早上都有一個慈善步行活動 - 童樂行，因為小小豬要返主日學，所以就唔到時間去參加依個有意義嘅活動。不過唔緊要，希望佢地明年會再舉辦，到時可以等小小豬參加。

雖然我地冇參加慈善步行活動，不過都帶小小豬去玩吓啲攤位遊戲，參觀麥當勞叔叔之家，都身體力行支持依個咁有意義活動啦！

由於今日所有活動都係為麥當勞叔叔之家籌募經費，所以第一時間當然要去買遊戲卷玩攤位。四十蚊就有十張遊戲卷，可以玩場內有大約十多個攤位遊戲，而且玩完遊戲仲可以儲印章換禮物，真係可以話玩住嚟做慈善呀~

小小豬一見到個彈彈床就豪不考慮地走去排隊玩啦~

之後就去玩攤位遊戲，其實今次啲攤位遊戲都比較多集中以環保做主題，都有幾個遊戲都係將啲廢物放回環保回收箱，雖然好似遊戲性質差唔多，不過等小朋友可以係遊戲中學習，真係唔錯嘅安排。經過玩依幾個攤位遊戲，小小豬都識得『藍廢紙、黃鋁罐、啡膠樽』啦~

另一邊嘅攤位遊戲就娛樂性豐富少少，好似有拋波波、渣搖控車、拋彩虹，真係樣樣都啱小小豬玩呀~

其中一個攤位係可以扮小軍人，係咁多遊戲在旁，原本都以為小小豬唔多願意影相。點知今次真係出奇地係小小豬主動話想影，相信佢都係俾啲槍吸引到。既然佢咁主動，我當然非常樂意陪佢影啦~

小小豬依個軍人LOOK可以嗎，直頭CHOK到冇朋友啦....哈哈哈~

玩完攤位遊戲之後，我地就去排隊準備參觀麥當勞叔叔之家了，想知道多啲麥當勞叔叔之家入面有啲咩，咁就請留意下一篇網誌啦！

因為覺得麥當勞叔叔之家係一個好有意思嘅地方，所以想同大家作多少少分享，等大家繼續支持麥當勞叔叔之家呀！

MY FACEBOOK~

MY E-MAIL~

Kathy Wong@myblogs.asia