情侶二人世界去旅行，無錯係一件好浪漫嘅事黎。但同時間亦有好多人都會話情侶一齊去旅行，就係最能夠睇到兩個人合拍程度去到邊嘅考驗，睇得出兩個人嘅關係係唔係「真金不怕洪爐火」。
好啦～比盡你真係成個旅程都無鬧過交。
但唔講真係唔知道原來喺台灣人嘅傳聞中，唔少嘅熱門景點都係「情侶禁忌景點」，話會增加去過嘅情侶分手嘅機會！例如Selina同阿中結婚嘅地點八卦山就係其中之一！所以你都唔好話唔信邪呀！！
▼1. 彰化八卦山▼
Selina同阿中無耐之前突然就極速「閃分」，消息震驚圈內圈外，令人難以置信。而對點解兩個人好地地都會分開，有網友就發現可以追溯到兩個人舉行婚禮嘅場地－彰化八卦山。傳聞話喺好耐之前，有一對相愛嘅情侶因為得唔到家人嘅祝福，於是就曾經喺八卦山大佛前面許下毒誓，指出怨恨世間上所有情侶。更甚嘅係發下毒誓之後，兩人就喺佛像垂耳上吊自殺，所以就有人覺得情侶黎過八卦山就好大機會分手。
▼2. 木柵指南宮▼
木柵指南宮係台灣非常出名嘅廟宇之一，每年都吸引唔少遊客到訪，而且景色都真係非常之靚，影相真係一流。但由於南宮主為八仙中的純陽始祖呂洞賓，加上佢曾經喺追求何仙姑嘅時候慘食檸檬，因此傳聞情侶去過南宮就會漸漸產生嫉妒之心，令南宮成為左情人分手「第一名」嘅景點。
▼3. 新店碧潭吊橋▼
有人話新店碧潭吊橋係考驗情侶感情夠唔夠穩陣，係唔係對方一生一世對象嘅一個景點。相傳踏上碧潭吊橋嘅情人喺走上橋上嘅時候，都必須要互相扶持全程行完為止，如果萬一喺橋嘅中途停底，或者分開，情侶分手嘅機會就會增加。
▼4. 淡水漁人碼頭▼
喺新北市淡水嘅漁人碼頭入面，有一條非常出名嘅「情人橋」。雖然無錯喺黃昏之後，開左彩燈景色係非常吸引、浪漫，但有傳喺燈光變成綠色嘅一刻，情侶係唔可以互相對望，如果唔係就會增加分手嘅機會。
▼5. 基隆情人湖▼
「情人湖」叫得「情人湖」，唔係就係比情侶去嘅咩？但原來喺情人湖呢個名嘅背後，係有著更驚人嘅真相！除左傳聞過往曾經有一對情侶因為家人反對，喺呢度投河自盡之外，其實喺情人湖嘅旁邊仲有唔少嘅骨灰罈同墳墓，所以唔少人都覺得兩者同時都影響情侶嘅運勢。
▼6. 石門十八王公廟▼
去過石門十八王公廟嘅都會知道，景點中最為突出嘅景物，就係廟外超級巨型嘅黑龍義犬。而之所以會為義犬立像，原因就係因為喺清朝同治年間，一艘載住17位商人及狗狗嘅商船不幸翻沈，最後只剩底狗狗一個生還獲村民發現。然後喺村民將17人好好埋葬之後，狗狗亦都因為見主人都過身，而悲痛離世。因此狗狗就同17位主人一齊安葬山腳之下，及後更獲居民封為「十八王公」，指出遇上海難嘅時候都會得到佢地相救，所以十八王公廟亦都漸漸成為左台灣知名神廟。
雖然石門十八王公廟嘅典故係非常正面，但由於傳聞喺十八王公廟附近住左唔少嘅遊魂野鬼，經常都會妒嫉恩愛情侶，因此十八王公廟就被人認定為「情侶禁忌景點」之一。
雖然以上嘅傳聞都講到似層層咁，但其實大家又唔需要咁迷信，每個景點都從此避開唔同另一半去。情侶之間最重要嘅，始終都係兩人之間要彼此了解、尊重，咁先至能夠培養出一段長久、健康嘅感情，令二人陪伴對方走到人生嘅盡頭呢！
