由華納兄弟發行既電影《蝙蝠俠對超人：正義曙光》（Batman v Superman: Dawn of Justice），將會喺今個星期五（3月25日）上映，之前有傳言指佢喺史上成本最貴既電影，估計達至4.1億元。其實，以往有唔少荷里活大片，由預算到最終既製作費都所費不菲。
以下就根據IMDB以同埋以往票房紀錄所得，揾嚟呢10套製作費最貴既電影。
10.《異星爭霸戰：尊卡特傳奇》（John Carter） —2.59億
2012年上映既呢套科幻電影，改編自美國暢銷科幻小說"A Princess of Mars"，講述主角喺美國內戰之後，無啦啦被人送咗去火星，仲捲入咗一場火星族群之間既戰爭，電影由最初估算會用既2.5億元，到最後既成本一共用咗2.59億，而全球票房收益就收2.84億。
10.《蝙蝠俠：夜神起義》（The Dark Knight Rises）—2.59億
同樣係2012年上映既《蝙蝠俠：夜神起義》，繼續由「蝙蝠俠三部曲」同《潛行空間》（Inception）既導演Christopher Nolan執導，起初估計既預算係2.5億元，最終成套戲用咗2.59億，而票房收益都唔錯，達到10.8億。
10.《哈比人》（The Hobbit）— 2.59億
2012 年上映既電影《哈比人》，曾獲得多個頒獎禮提名，全球票房收益10.2億，同最初預算既2.5億元，到後來多成本用多咗9百萬元，即成套戲最終成本係2.59億。
9. 《阿凡達》（Avatar） —2.61億
由James Cameron執導既科幻電影《阿凡達》，2009年上映，成套戲就最終用咗2.61億，超出咗原本預算既2.37億，而全球票房收益達20.8億，仲喺2010年奧斯卡頒獎禮獲得多個後期製作獎項。
8.《加勒比海盜：決戰魔盜王》（Pirates of the Caribbean: Dead Man's Chest）— 2.65億
2006年上映既《加勒比海盜》系列第二集《 加勒比海盜：決戰魔盜王》，由最初預算既2.25億，到最後最終用咗2.65億，導演Gore Verbinski一直由電影系列第一集拍至第三集，今次第二集既全球票房收益達10億。
7.《未來水世界》（Waterworld） (1995)— 2.71億
1995年上映既電影《未來水世界》，係一套美國科幻電影，講述21世紀既地球，因為極地既冰雪融化令海平面上升，倖存既人類散落喺海洋上面既生活。電影最初預算為1.75億，而最終整套戲既成本一共用咗2.71億，最終票房收益2.64億。
6.《哈利波特：混血王子的背叛》（Harry Potter and the Half-Blood Prince） — 2.75億
風靡全球既魔法電影《哈利波特》系列，2009年上映第六集，可以話喺後兩集結局以外，最刺激既一集，繼續沿用《哈利波特》系列前五集既三位主角，可謂由細演到大。今次第六集用咗2.75億元作成本，多出最初預算既2.5億，全球票房收益9.344億。
5. 《魔髮奇緣》（Tangled） —2.81億
2010年上映既動畫電影《魔髮奇緣》，係其中一套人人都估唔到成本咁高既電影之一，咁係因為呢套電影揉合咗舊電影傳統手繪動畫《美女與野獸》、《獅子王》，以及CGI技術，令經典故事嚟到21世紀既今日，拍出另一種感覺。成套戲最初估計用2.6億，最終增至2.81億，而全球收益達至5.907億。
4. 《蜘蛛侠3》（Spider-Man 3） — 2.91億
由Tobey Maguire擔當主角既蝙蝠俠，嚟到2007年上映既第三集，被外星生物入侵變咗奸角之下，終於有「新形象」示人！電影全球票房收益就有8.909億，而最終成套戲花咗2.91億，多過最初預算既2.58億。
3. 《鐵達尼號》（Titanic）— 2.94億
1997年上映既電影《鐵達尼號》，全球票房收益達到 20.2億，由今年金像獎出爐影帝Leonardo Wilhelm DiCaprio同喺2009年憑住《讀愛》奪得金像獎影后既Kate Winslet拍，由最初預算估計既兩億，到最終成本足足超出接近一億，達至2.94億。
2. 《埃及妖后》（Cleopatra） — 3.4億
喺1963年由英國、美國、瑞士共同合拍既電影，而電影的主角Elizabeth Taylor，更憑住呢部電影而為人熟悉，全球票房收益達至5.78億，成本由最初估算既4.4億，到最後埋單用咗只係3.4億。
1. 《加勒比海盜：魔盜王終極之戰》（Pirates of the Caribbean: At World's End） —3.41億
呢套係《加勒比海盜》系列電影既第三集，2007年上映時全球票房收益達到9.63億，呢集仲請嚟周潤發飾演Captain Sao Feng一角，成套戲最初估計用3億，而最後成本就超出多4千100萬元，即總共用左3.41億。
