【點解日日都賣晒？】玫瑰花棗皇糕：抵過食珍寶珠啊！

UNCLE FONG 有朵玫瑰花(金絲棗皇糕)！

10蚊四粒甜品...…超抵喎！

最近， SY每晚沖完涼一定會叫:「今晚有咩甜品食呀？」...…

卒之手瘦腳瘦， 但就煉成一個大肚腩。

對付甜品怪，最好買健康少少，食完又不太罪惡的甜品，於是我鎖定玫瑰花做目標。

前日， 問太子分店店員，對方回答:「賣晒！ (聽日我幾點過嚟會有呢？)，唔知……」

昨日， 我又問同一店員:「賣晒，無再返貨，唔知幾時再返。」

心諗:「車！好巴閉咩？ 我去九龍灣分店， 唔鬼幫襯你。」

結果，14:15趕到九龍灣，終於買到最後8粒玫瑰糕。

姨姨好好人:「4粒熱你可以即刻食， 4粒凍，你唔好叮，一定要蒸先好食。」

熟的4粒，我與同事分享，同事K:「嗯...…好香喎，不過就係得個香字囉。」， 同事H接口:「係呀！好重紅棗味，都幾好，唔算太甜。」

我答:「算啦...…當支玫瑰花呃吓Like，十蚊有四粒，真係抵食過珍寶珠，煙煙韌韌，幾啱我胃口喎。

回家將其餘的蒸熱，我將玫瑰金絲棗糕遞給SY:「你今晚嘅甜品呀！」

大叫「花花好靚呀」的SY一邊食一邊說:「好食喎， 好似彈弓， 爸爸你食唔食呀？ (我:你食啦……我食咗啦)， 咁我食3粒， 媽媽食一粒啦。」

難怪甜品怪的肚腩愈來愈大啦！

大仁生活