iPhone 6個樣係點，相信有留意嘅讀者都已經係大陸網站睇過晒：機身大部咗、但又薄咗成個碼，睇落都咪話唔吸引。不過用得iPhone就當然要睇埋功能，因為今年Apple玩得更瘋狂，實行要將手機變成攝錄機，趕到DV無定企！
全新A8 CPU夠慳電 多20℅你信唔信
例牌先講吓硬件先：今次CPU又有再更新，64bit A8處理器，雖然Apple一貫作風，都係唔多講CPU真正有幾快，但有消息指A8將會係雙核 2.0GHz，1GB RAM嘅晶片組，另外再加上M8協同處理器，即係另設一粒CPU係入面，係有需要時就用來處理速感應器、指南針、陀螺儀及氣壓計等數據，變相減輕主CPU負擔，並加快手機處理速度。
而電池方面，多得新CPU及加大機身，Apple表示iPhone 6及6 Plus將可以有10及12小時 4G LTE上網、10及14小時影片播放、以及50及80小時音樂播放時間。不過官方話電池續航力最少多以前20℅，不過筆者就勸大家都聽著先，並且以最低使用時間為準。始終香港人手機上網率真係世界頭十位之內，隨時搭一個鐘車返工就可以無咗10℅電。
機身薄咗但重咗 藍寶石屏幕無咗影
機身方面，iPhone 6 長5.44吋、寬2.64吋，但就只有0.27吋厚；而iPhone 6 Plus 長6.22吋、寬3.06吋，厚0.28吋。即係雖然機身大咗又長咗，但仲薄過iPhone 5S嘅0.3吋機身。不過薄咗都唔等於輕咗，單係iPhone 6就重咗成17克、而iPhone 6 Plus重要有成172克（iPhone 5S重112克），不過機身大咁多，但薄又唔係薄好多，機身重咗在所難免。
屏幕方面，有4.7吋同5.5吋兩個size，而畫面解像度就分別係iPhone 6 1334x750 326 ppi、以及iPhone 6 Plus 1920x1080 401ppi，即係兩者都已經都最少支援到720p影片播放（5s解像度為 1136 x 640，唔大唔細、睇片兩頭唔到岸）。不過最奇怪，就係之前大家都話會用嘅藍寶石屏幕（一種比現時屏幕更堅硬物料），到最後竟然影都無埋，可能因為產能同價錢問題而搞到今次未有得用著。
拍片影相再加強 DV就快無定企
去到拍片同影相方面，就應該算係成部iPhone 6重點。雖然字面上新機鏡頭同iPhone 5S都係800萬像素，但係iPhone 6同Plus今次就加入咗多樣新功能。其中一樣就係Focus Pixels對焦系統（類雙單反相機相位檢測對焦），Apple聲稱其對焦速度將會更快更準確；而另一方面，鏡頭係人面對焦系統上都有大更新，使用家係拍攝人較多的場景、或者係拍攝影片之時，都可以一直將焦點集中係主體面孔之上。而用家今次無正以拍打
另外拍片今次都有新設計，雖然iPhone 5S可以拍攝1080p 30fps、又或者以一秒120fps慢動作拍攝，好多人都覺得好夠用。不過iPhone 6同Plus今次就加到去1080p 60fps、以及一秒240fps拍攝速度，講真今次真係誇張咗小小，但無人會唔歡迎呢個新設計，係咪？
而講開拍攝功能，今次iPhone 6 Plus有樣新功能，就係第一部iPhone加入光學防震技術，即係以機械方式、而非以軟件後製去，去穩定拍攝時影片，出來效果自然會更加清晰銳利。
4G LTE支援頻譜多 一機全球通行
而最後一點，對於經常要出外國公幹嘅人應該好有用，就係香港版iPhone 6同Plus，都支援20個 4G LTE頻譜，可以話大部份4G LTE使用國，都可以用到港版iPhone 6個4G。以係出去族遊，就算租唔到Wifi大家都唔使捱個慢到嘔嘅3G喇。
