致香港各大泛民、本土政黨及政治組織之公開信（鋼筆鼻窿）

各大泛民、本土政黨及政治組織：

2016年立法會選舉，將會係自1997年7月1日後，另一個決定香港前途嘅轉折點。呢18年來發生咗咁多嘅事情，我相信好多香港人都對中央政府失去信心，而開始擔心2047後嘅政治前途。話雖如此，有40萬個香港嘅下一代卻係無動於衷，並無登記做選民，身為一名愛護香港嘅年青人，我感到十分痛心。

面對如此景況，非建制派嘅政黨及支持者，到呢一刻仍然繼續互鬥，並無停過手去做一啲能夠改變大局嘅野。我並唔係想泛民本土應該團結配票，而係大家不斷指責對方鎅票、不以大局為重，或者搶別人光環參選，呢啲都係無理嘅指控。選票係選民手上，佢地想投邊個就投邊個，指責者認為選票會被搶走，令某政黨流失議席，但從來無去計劃開拓新嘅票源，而單靠現時政黨開幾個街站去做選民登記，係完全無用。

因此，本人呼籲香港各大泛民、本土政黨及政治組織，能夠成立一個跨政黨組織，去推動年青人登記選民。呢個跨政黨組織可以仿效英國或美國嘅類似組織（英國Bite the Ballot聯同大大小小組織，發起於同一日召集年青人登記選民），發起大型選民登記行動，令到40萬個未登記做選民嘅18-30歲年青人肯去登記。

距離選民登記截止5月2日仲有一個半月，梁天琦用10日可以拎到6萬6千票，我相信奇蹟係會出現！只有咁樣，先至可以真正喚起年青人留意身邊嘅事情，令香港政治生態百花齊放，並從中國共產黨手中救回香港。

作者：鋼筆鼻窿（本文章由聚言時報授權提供）