【女士恩物】補血去水腫：生熟薏米红豆水

雖然我煲涼茶主要都係為小小豬多，不過係適當時候都要愛錫下自己(女士們懂的)，所以今日就煲左生熟薏米红豆水俾自己飲下啦~

其實我都唔識煲依款涼茶，剛好係啲FACEBOOK啲煮食GROUP見到有朋友仔同我地分享，見個整法好簡單，同埋對女仕非常之好，最緊要係......上次煲湯同煲糖水時用有啲存貨係屋企，所以即刻唔洗諗咁多，入廚房執齊材料煲煲佢啦！

上網睇返啲資料，原來生熟薏米红豆水可以消腫祛濕同埋補血作用。紅豆熱量比較低，所以除左養血益氣之外，對減肥瘦身都有幫助。薏米就有美白及清熱排毒嘅功效，而且對利水祛濕同埋去水腫都有非常好嘅作用。

由於生薏米本身都有點寒涼，女仕們都不宜飲太多寒涼嘢，所以要加啲熟薏米一齊煲，咁就啱晒啦！

材料：

紅豆約半飯碗、熟薏米及生薏米各兩湯匙

做法：

1. 首先將材料洗乾淨，最好就係煲嘅前一晚開始浸泡~

2. 由於都只係煲我一個人份量，所以我係煲內放6個飯碗嘅水~

3. 煲滾水之後放下所有材料，大火滾30分鐘~

4. 然後再用細火煲45分鐘~

5. 熄火後再焗多15分鐘，然後隔清晒啲渣，就可以飲得啦~

其實我個人嚟講都有少少唔鐘意薏米嗰一種味道(當然……煲俾小小豬飲就另一說法)，但估唔到連同紅豆一齊煲時，紅豆嗰一種香味就蓋過薏米味道，而且完全洗落糖都飲到嗰一份甜味，所以又幾啱我口味呀！

當然飲一次又真係睇唔到啲咩成效，我依個份量就夠我一個人飲一日，今日密密飲又真係比平日去VV次數密左又多左，唔通係幫我排水去水腫？

哈哈哈...…係就好啦…...我真係肥左好多，係時候要開始減下肥！